ភូមា៖អ្នកនាំពាក្យរបស់សហព័ន្ធជលផល មីយ៉ាន់ម៉ា (ភូមា)បានឲ្យដឹងកាលពីថ្មីៗនេះថា ទូកនេសាទរបស់ប្រជានេសាទថៃ នឹងមិនអាចចូលទៅនេសាទក្នុងដែនទឹក របស់មីយ៉ាន់ម៉ា បានទៀតទេ ចាប់ពីខែមីនា ឆ្នាំ ២០១៤ ក៏ព្រោះតែកិច្ចព្រមព្រៀងត្រូវបញ្ចប់។
សារព័ត៌មានមីយ៉ាន់ម៉ាថាម បានចុះផ្សាយថា សេចក្តីសម្រេចនេះត្រូវបានធ្វើឡើង ក្រោយពីសិក្ខាសាលាមួយរៀបចំឡើងនៅទីក្រុងមួយនៃប្រទេសមីយ៉ាន់ម៉ា កាលពីសប្តាហ៍ មុនដោយក្រសួងបសុសត្វ និងជលផលរបស់ មីយ៉ាន់ម៉ា ស្តីពីសិទ្ធិនេសាទរបស់ថៃ។ សិក្ខាសាលានេះមានការចូលរួមពីក្រុមអ្នកជំនាញ ធុរជន អ្នកតំណាងស្ថាប័នឧស្សាហកម្មមួយចំនួន និងរៀបចំឡើងដោយលោក U Khin Maung Ay រដ្ឋមន្ត្រីក្រសួងបសុសត្វ និងជលផល មីយ៉ាន់ម៉ា។
“យើងបានពិភាក្សាគ្នាអំពីសិទ្ធិនេសាទនេះរួចហើយ ហើយក្រុមអ្នកជំនាញបានផ្តល់ព័ត៌មាននេះ ដោយបានស្នើសុំមិនឲ្យរដ្ឋាភិបាលបន្តកិច្ចព្រមព្រៀងនេះទៀតទេ នៅឆ្នាំ ២០១៤”។ នេះជាសម្ដីរបស់លោក U Khin Maung Ay បានថ្លែងឲ្យដឹង។
គួរបញ្ជាក់ផងដែរថា កិច្ចព្រមព្រៀងនាពេលកន្លងមក ដែលបានអនុញ្ញាតឲ្យទូកនេសាទបរទេសចូលមកនេសាទក្នុងដែនសមុទ្រ មីយ៉ាន់ម៉ា គឺដោយផ្អែកលើគំនិតដែលថាមានផលត្រីលើសច្រើន តែផលលើសនេះឥឡូវលែងមានទៀតហើយ៕
មតិយោបល់