រយៈពេលប៉ុន្មានឆ្នាំចុងក្រោយមកនេះ វិស័យសិល្បៈ និងសារព័ត៌មានក្នុងប្រទេសកម្ពុជាកំពុងបោះជំហានទៅមុខ យ៉ាងសស្រាក់សស្រាំ និងមានកំណើនគួរឲ្យកត់សម្គាល់ ។ក្នុងនោះដែរយើងសូមលើកចំណុចនៃការថតចំលងគ្នា ក្នុងវិស័យសិល្បៈ មកបរិយាយជូនប្រិយមិត្ត គ្រាន់ទុកជាចំណុចរិះគន់ក្នុងន័យស្ថាបនា ដែលមានដូចខាងក្រោមនេះ៖
វិស័យឧស្សាហកម្មតន្ត្រី រយៈពេល ប៉ុន្មានឆ្នាំចុងក្រោយមកនេះកំពុងរីកដូចផ្សិត ក្នុងនោះមានផលិតកម្មខ្លះបើក ហើយក៏ផ្អាកទៅវិញផងដែរ ដោយសារតែរូបមន្តថតចំលងច្រើនពេក ដែលស្ថាប័នពាក់ព័ន្ធមិនបានយកភ្នែកមើល ដោយបណ្តោយឲ្យ អ្នកទាំងនោះថតចំលងគ្នា ទៅវិញទៅមក ។ ត្រង់ចំណុចថតចំលងពីគ្នានៅក្នុងប្រទេសវាមិនសូវជាជះឥទ្ធិពលប៉ុន្មាននោះទេ តែករណីដែលយកបទចម្រៀងគេមកច្រៀង ដោយត្រឹមតែសម្រួលបទភ្លេង និងទំនុកច្រៀងនោះ វាបានធ្វើឲ្យវិស័យតន្ត្រីផ្នែកចំរៀងសម័យមួយនេះ កំពុងស្ថិតនៅក្នុងស្ថានភាពតោកយ៉ាក និងបណ្តាលឲ្យប្រទេសជិតខាងដែលធ្លាប់តែមានពន្លឺខ្សត់ខ្សោយកាលពីមុន មកមើលងាយសង្គមខ្មែរដែលធ្លាប់មានពន្លឺត្រចះត្រចង់លើវិស័យមួយនេះ។រូបភាពថតចំលងគ្នានេះដែរ វាមានគ្រប់ស្ថានភាព តែម្តង ដោយអ្នកខ្លះលួចតាំងពីចំណងជើងបទចម្រៀងរបស់គេ មកនិពន្ធ និងអ្នកខ្លះទៀត គ្រាន់តែយកមកសម្រួលអត្ថន័យ ពីគេបន្តិចបន្តួច តែបូករួមមកអត្ថន័យបទចំរៀងតែមួយ ដែលធ្វើឲ្យម្ចាស់គេដែលខំគិតឡើងប្រេះលលាដ៍ នោះ ទៅជាគ្មានប្រយោជន៍ទៅវិញ ។
រំឭកចំណុចកូពីនេះដែរ យើងមិនគួរបន្ទោសលើ តារាចម្រៀងដែលជាអ្នកច្រៀងនោះទេ ត្រូវបន្ទោសទៅលើ ម្ចាស់ផលិតកម្ម និងអ្នកនិពន្ធ ដែលគ្មានសមត្ថភាពបង្កើតបទថ្មី ឲ្យតារាចម្រៀងរបស់ខ្លួនច្រៀង ។តែទោះជាយ៉ាងណាចូលមកដល់ឆ្នាំ ២០១៣ នេះយើងសង្កេតឃើញថា សិល្បៈករខ្មែរ និងតន្ត្រីខ្មែរ បានផ្អាកការថតចំលងគេ ដោយក្នុងនោះ ផលិតកម្ម មួយចំនួនបានព្យាយាមបង្កើតសាច់ភ្លេងចំរៀងថ្មី ទំនុកច្រៀងថ្មី ដែលជាស្នាដៃកូនខ្មែរ ប៉ុន្តែផលិតកម្មមួយចំនួន ក៏កំពុងតែគឃ្លើនចរិកកូពី ដាក់មហាជនដែលគាំទ្រផលិតកម្ម របស់ខ្លួន កន្លងមក។
ដោយឡែកសម្រាប់វិស័យព័ត៌មានក្នុងប្រទេសកម្ពុជាវិញ ក្នុងឆ្នាំ ២០១៣ នេះដែរវាកំពុងតែរីកដូចផ្សិតដូចគ្នាមិនខុសពីវិស័យឧស្សាហកម្មតន្ត្រីប៉ុន្មាននោះទេ ដោយមានឈ្មួញជាច្រើនកំពុងចាប់អារម្មណ៍លើវិស័យមួយនេះ ដែលកំពុងប្រកួតប្រជែងគ្នាយ៉ាងចាស់ដៃ។ ជាមួយនឹងភាពរីកចំរើនយ៉ាងគំហុកលើវិស័យសារព័ត៌មាន ក៏មានក្រុមមនុស្សមួយចំនួនតូច ដែលកំពុងបង្ករព្យុះភ្លៀង ដោយកូពីអត្ថបទម្ចាស់ដើម ដែលខំបកប្រែសម្រួលពីអត្ថបទបរទេស យកមកធ្វើជាកម្មសិទ្ធរបស់ខ្លួន មានគេហទំព័រមួយចំនួនទៀត ក៏សូមការអនុញ្ញាតិយ៉ាងត្រឹមត្រូវពីម្ចាស់ដើម និងបានដាក់ប្រភពកូពីយ៉ាងត្រឹមត្រូវផងដែរ ។ មួយវិញទៀតក្នុងនោះក៏មានគេហទំព័រមួយចំនួនតូចទៀត ដោយត្រឹមតែ មើលអត្ថបទដែលម្ចាស់ដើមគេគេខំបកប្រែ ពីបរទេស មកជាខេមរៈភាសា និងសម្រួលពាក្យតិចតួចមកធ្វើជាកម្មសិទ្ធផងដែរ។ ចំណុចនេះដែរយើងពិបាកថា ដែរព្រោះថា “មាត់អ្នកប្រកែកញ៉ាញ តែក្នុងចិត្តនិងខួរអ្នកបានដឹងច្បាស់ថាបានធ្វើវារួចទៅហើយ” ។
ខាងមុខនេះដែរ ខណៈដែលកម្ពុជាកំពុងហៀបនឹងចូល សមាហរណកម្មអាស៊ាន ប្រសិនបើ រូបភាពកូពី នៅតែមានដូចនេះ តើខ្មែរទៅជាយ៉ាងណា ? វាមិនទៅធ្វើកម្មករលើដីឯងទេឬ ? ៕
មតិយោបល់