ថៃ៖ចំនួនភ្ញៀវទេសចរណ៍អន្តរជាតិទៅទស្សនាប្រទេសថៃបានធ្លាក់ចុះ ៣០០.០០០នាក់ មកទល់ពេលនេះ ដោយសារតែការតវ៉ាប្រឆាំងរដ្ឋាភិបាល។ នេះបើយោងតាមរបាយការណ៍ផ្លូវការមួយរបស់ក្រសួងទេសចរណ៍កាលពីថ្ងៃពុធកន្លងទៅ។
ការបាត់បង់ភ្ញៀវទេសចរណ៍បរទេសនេះ បានចំណាយប្រាក់របស់រដ្ឋប្រមាណ១៦ពាន់លានបាតប្រហែលនឹង៤៩៤,៧លានដុល្លារអាមេរិកក្នុងប្រាក់ចំណូលទេសចរណ៍។ នេះបើយោងតាមសម្ដីរបស់លោក Suwat Sitthilor លេខាធិកាអចិត្ត្រៃយ៍នៃក្រសួងទេសចរណ៍ និងកីឡា។
លោកបានបន្តទៀតថា ប្រសិនបើបាតុកម្មនៅតែបន្តរហូតដល់ចុះឆ្នាំនេះទៀតនោះ ឧស្សាហកម្មគ្មានផ្សែងមួយនេះនឹងទទួលរងនូវការបាត់បង់ប្រាក់ចំណូល និងប៉ះពាល់យ៉ាងខ្លាំងដល់វិស័យសេដ្ឋកិច្ច។
បច្ចុប្បន្នមានប្រមាណជាង ២៣ប្រទេសនៅជុំវិញពិភពលោកបានមកទស្សនានៅក្នុងប្រទេសថៃ ហើយនៅពេលនេះ អាជ្ញាធរទេសចរណ៍ថៃកំពុងតែមានវិធានការក្នុងការទប់ស្កាត់មិនឲ្យប៉ះពាល់ដល់ភ្ញៀវទេសចរណ៍បរទេស។
អនុប្រធានទំនាក់ទំនង និងទីផ្សាររបស់អាជ្ញាធរទេសចរណ៍ថៃ លោក Sugree Sithivanich បាននិយាយថា វិស័យទេសចរណ៍របស់ប្រទេសថៃនឹងរង់ផលប៉ះពាល់យ៉ាងខ្លាំងនៅឆ្នាំក្រោយ បើសិនជាការតវ៉ានេះនៅតែបន្តមិនព្រមបញ្ចប់។
កាលពីសប្ដាហ៍មុន ក្រុមប្រឹក្សាភិបាលទេសចរណ៍នៃប្រទេសថៃបានរំពឹងទុកថា ប្រទេសថៃនឹងទទួលបានភ្ញៀវទេសចរណ៍បរទេសចំនួន ២៨លាននាក់នៅក្នុងឆ្នាំ ២០១៤ ដោយកើនឡើង ៨ភាគរយបើធៀបនឹងឆ្នាំនេះ ដោយមានត្រឹមតែ ២៦,៦លាននាក់៕
មតិយោបល់