ក្រុមហ៊ុនហ្វាំងឡង់ Nokia បានត្រៀមខ្លួនរួចជាស្រេចក្នុងការបង់លុយយ៉ាងហោចណាស់ ៣៥៥លានអឺរ៉ូ ប្រហែលនឹង ៤៨៧លានដុល្លារអាមេរិក សម្រាប់អាជ្ញាធរនៃប្រទេសឥណ្ឌាដើម្បីដំណើរការការផ្ទេរសិទ្ធិកាន់កាប់រោងចក្រមួយទៅឲ្យក្រុមហ៊ុន Microsoft ។ នេះបើយោងតាមសម្ដីរបស់មនុស្សពីរនាក់បានបង្ហើបប្រាប់សារព័ត៌មាន Blooomberg ។
ប្រភពដដែលបានបន្តទៀតថា ក្រុមហ៊ុន Nokia មានឆន្ទះបង់លុយយ៉ាងហោចណាស់ ២៧០លានអឺរ៉ូ សម្រាប់ការយល់ព្រមឲ្យមានការផ្ទេររោងចក្រ ហើយ Nokia នឹងបង់លុយតាមក្រោយបន្ថែមទៀតនៅពេលដែលការផ្ទេរត្រូវបានបញ្ចប់។
នៅពេលនេះ អ្វីដែលជាបញ្ហាសម្រាប់ក្រុមហ៊ុន Nokia នោះគឺការជាប់គាំងនៃការលក់ទ្រព្យសម្បត្តិដែលពាក់ព័ន្ធនឹងអាជីវកម្មទូរស័ព្ទចល័ត បើទោះបីជាក្រុមហ៊ុន Nokia បានលក់អាជីវកម្មមួយនេះទៅឲ្យក្រុមហ៊ុន Microsoft ក្ដី ប៉ុន្តែទ្រព្យមួយចំនួនមិនត្រូវបានផ្ដល់ឲ្យនោះទេ ដូច្នេះហើយទើប Nokia តម្រូវលក់ទ្រព្យសម្បត្តិទាំងនោះទៅឲ្យអ្នកផ្សេង ប៉ុន្តែការធ្វើបែបនេះ នៅជាប់ពាក់ព័ន្ធនឹងបញ្ហាច្បាប់នៅក្នុងប្រទេស ព្រោះក្រុមហ៊ុន Nokia នៅជំពាក់ពន្ធរដ្ឋឥណ្ឌា។
នៅក្នុងសេចក្ដីថ្លែងការណ៍ ក្រុមហ៊ុន Nokia បាននិយាយថាខ្លួនបានប្ដេជ្ញាចិត្តក្នុងការទទួលយកនូវទ្រព្យសម្បត្តិ ហើយក៏ព្រមចូលខ្លួនដោះស្រាយបញ្ហាពន្ធជាមួយនឹងទីភ្នាក់ងារពន្ធរបស់ឥណ្ឌាផងដែរ។
គួរបញ្ជាក់ផងដែរថា ក្រុមហ៊ុន Nokia បានលក់អាជីវកម្មទូរស័ព្ទចល័តទៅឲ្យក្រុមហ៊ុន Microsoft ក្នុងតម្លៃ ៥.៤៤ពាន់លានអឺរ៉ូ ដោយការទិញ-លក់នេះនឹងត្រូវបញ្ចប់នៅដើមឆ្នាំ ២០១៤៕
មតិយោបល់