សេអ៊ូល៖ ក្រុមហ៊ុនផលិតរថយន្តជប៉ុនតូយ៉ូតាត្រូវបានបញ្ជាឲ្យប្រមូលរថយន្តប្រមាណជាង ១១.០០០គ្រឿងនៅក្នុងប្រទេសកូរ៉េខាងត្បូងមកជួសជុលដោយសារតែបញ្ហាប្រព័ន្ធម៉ាស៊ីនត្រជាក់។ នេះបើយោងតាមក្រសួងដឹកជញ្ជូនរបស់ទីក្រុងសេអ៊ូលបានឲ្យដឹងនៅថ្ងៃចន្ទម្សិលមិញ។
ក្រសួងដីធ្លី ហេដ្ឋាចរនាសម្ព័ន្ធ និងដឹកជញ្ជូនរបស់កូរ៉េខាងត្បូងបានបញ្ជាក់ថារថយន្តសរុបចំនួន១១.៥០៧ គ្រឿងដែលក្រុមហ៊ុនតូយ៉ូតាបានលក់នៅក្នុងប្រទេសនេះ បានមានបញ្ហាទៅលើប្រព័ន្ធម៉ាស៊ីនត្រជាក់ដែលលេចធ្លាយទឹកជ្រាបចូលទៅក្នុងប្រព័ន្ធគ្រប់គ្រងពោងសុវត្ថិភាព និងប្រអប់ចង្កូតរថយន្ត។
រថយន្តដែលត្រូវប្រមូលមកជួសជុលនោះមានរថយន្តប្រភេទដឹកអ្នកដំណើរចំនួន ១០.៩៦១គ្រឿង ដែលផលិតឡើងនៅចន្លោះថ្ងៃទី២០ខែតុលា ឆ្នាំ ២០១១ និងថ្ងៃទី១៦ ខែឧសភាឆ្នាំ ២០១៣។ ក្នុងនោះក៏មានផងដែរនូវរថយន្តម៉ាក Venza ចំនួន ៥៤៦គ្រឿង ដែលផលិតឡើងចន្លោះថ្ងៃទី១៤ខែសីហា និងថ្ងៃទី២៨ខែមីនា ឆ្នាំ ២០១៣។
ម្ចាស់រថយន្តដែលជួបនូវបញ្ហាខាងលើអាចធ្វើការទាក់ទងទៅកាន់មជ្ឈមណ្ឌលថែរក្សារបស់តូយ៉ូតាដែលមាននៅក្នុងប្រទេសកូរ៉េខាងត្បូង សម្រាប់សេវាកម្មផ្ដល់ជូនឥតគិតថ្លៃ។
ព្រមជាមួយគ្នានោះក្រសួងក៏បានបញ្ជាក់ឲ្យដឹងផងដែរថា រថយន្តប្រភេទ Jaguar និង Land Rover ក៏បានប្រកាសប្រមូលចំនួន ៨៨៨គ្រឿងផងដែរ ដោយសារតែមានបញ្ហាធុងប្រេង៕
មតិយោបល់