ភ្នំពេញ៖ កុមារី ២ នាក់នៅ ខេត្តកំពង់ចាមដែលឆ្លងវីរុសផ្តាសាយបក្សី H5N1បានជាសះស្បើយ ពីជំងឺដ៏កាចសាហាវនេះហើយ និងបច្ចុប្បន្នកំពុងតែមានសកម្មភាពជាធម្មតា។ នេះបើយោងតាម ក្រសួងសុខាភិបាល និងអង្គការសុខភាពពិភពលោក បានឲ្យដឹងនៅថ្ងៃសុក្រម្សិលមិញនេះ។
ក្រសួងសុខាភិបាល និងអង្គការសុខភាពពិភពលោក បានចេញសេចក្ដីប្រកាសជារួមនៅថ្ងៃទី២៧ ខែកុម្ភៈ ឆ្នាំ ២០១៤ កន្លងទៅនេះថា មានករណីផ្តាសាយបក្សីចំនួន ២ ត្រូវបានអះ អាងថា វិជ្ជមានវីរុសផ្តាសាយបក្សី H5N1ក្នុងឆ្នាំនេះ ដែលនេះជាករណីទី ៤ និងទី ៥ ក្នុងឆ្នាំ នេះ និងជាករណីទី ៥១ និងទី ៥២ ដែលបានឆ្លងវីរុសផ្តាសាយបក្សី H5N1 ហើយករណីទាំងពីរនេះ មកពីខេត្តកំពង់ចាម ដែល ៤០ ករណីក្នុងចំណោមករណីទាំង ៥២ ដែលកើតមាននៅកម្ពុជា កើតលើកុមារអាយុក្រោម ១៤ ឆ្នាំ និង ២៩ ករណីក្នុងចំណោម ៥២ ជានារី ។ ជាបន្ថែមមាន ១៨ ករណីមានជីវិត ចាប់ពីមានជំងឺផ្តាសាយបក្សីលើកដំបូងនៅកម្ពុជាក្នុងឆ្នាំ ២០០៥។
ករណីទី ៤ កើតលើកុមារីម្នាក់អាយុ ១០ ឆ្នាំមានទីលំនៅក្នុងភូមិរវៀង ឃុំស្នរដំបង ស្រុកជើងព្រៃ ខេត្តកំពង់ចាម(បច្ចុប្បន្នស្ថិតក្នុងខេត្តត្បូងឃ្មុំ) ដឹងតាមរយៈប្រព័ន្ធតាមដានជំងឺ គ្រុនក្តៅរបស់អង្គការផ្នែកស្រាវជ្រាវវេជ្ជសាស្ត្រនាវាសហរដ្ឋអាមេរិក ត្រូវបានបញ្ជាក់ដោយ វិទ្យាស្ថានប៉ាស្ទ័រកម្ពុជានៅថ្ងៃទី ២០ ខែកុម្ភៈ ឆ្នាំ ២០១៤ ថាមានជំងឺផ្តាសាយបក្សី H5N1។ នាងចាប់ផ្តើមមានគ្រុនក្តៅនៅថ្ងៃទី ២៦ ខែមករា ឆ្នាំ ២០១៤ ។ ម្តាយកុមារីបានទិញថ្នាំនៅភូមិ ហើយចាប់ពីថ្ងៃទី ២៧ ខែមករា ឆ្នាំ ២០១៤ នាងបន្តមានគ្រុនក្តៅ ហូរសំបោរ ក្អួត និងឈឺពោះ ។ នៅថ្ងៃទី ២៩ ខែមករា ឆ្នាំ ២០១៤ បុគ្គលិកគម្រោងរបស់អង្គការផ្នែកស្រាវជ្រាវវេជ្ជសាស្ត្រ នាវាសហរដ្ឋអាមេរិកបានប្រមូលសំណាកពីកុមារី ។
នៅពេលបានទទួលលទ្ធផលថា មានផ្ទុក វីរុស H5N1 នាងត្រូវបានបញ្ជូនទៅ និងដាក់ឲ្យសំរាកនៅមន្ទីរពេទ្យបង្អែកខេត្តកំពង់ចាម នៅ ថ្ងៃទី ២០ ខែកុម្ភៈ ឆ្នាំ ២០១៤ និងបានទទួលការព្យាបាលដោយឱសថ Tamiflu នៅថ្ងៃដដែល នោះ ។ បច្ចុប្បន្ននាងបានជាសះស្បើយ និងមានសកម្មភាពធម្មតា ។ នាងបានប៉ះពាល់ជាមួយ បក្សីឈឺ និងងាប់ ។ ទានៅកសិដ្ឋានចិញ្ចឹមទា ក្នុងភូមិកុមាររស់នៅ ចាប់ផ្តើមងាប់ភ្លាមៗនៅ ពាក់កណ្តាលខែមករា ឆ្នាំ ២០១៤ ។ ម្តាយនាងបានទិញទាឈឺ និងងាប់នៅថ្ងៃទី ២៥ ខែមករា ហើយគ្រួសារបានរៀបចំធ្វើម្ហូប ដោយមានការជួយធ្វើម្ហូបពីកុមារី។
ករណីទី ៥ កើតលើកុមារីម្នាក់អាយុ ១១ ឆ្នាំមានទីលំនៅក្នុងភូមិឡាអោក ឃុំក្រែក ស្រុកពញាក្រែក ខេត្តកំពង់ចាម(បច្ចុប្បន្នស្ថិតក្នុងខេត្តត្បូងឃ្មុំ)ដឹងតាមរយៈប្រព័ន្ធតាមដានជំងឺ គ្រុនក្តៅរបស់អង្គការផ្នែកស្រាវជ្រាវវេជ្ជសាស្ត្រនាវាសហរដ្ឋអាមេរិក ត្រូវបានបញ្ជាក់ដោយ វិទ្យាស្ថានប៉ាស្ទ័រកម្ពុជានៅថ្ងៃទី ២០ ខែកុម្ភៈ ឆ្នាំ ២០១៤ ថាមានជំងឺផ្តាសាយបក្សី H5N1។
នាងចាប់ផ្តើមមានគ្រុនក្តៅនៅថ្ងៃទី ០៩ ខែកុម្ភៈ ឆ្នាំ ២០១៤ ។ នៅថ្ងៃទី ១០ ខែកុម្ភៈ ឆ្នាំ ២០១៤ នាងបន្តមានអាការៈ គ្រុនក្តៅ ហូរសំបោរ ក្អក ឈឺបំពង់ក និងក្អួត ។ នៅថ្ងៃទី ១០ ខែកុម្ភៈឆ្នាំ ២០១៤ បុគ្គលិកគម្រោងរបស់អង្គការផ្នែកស្រាវជ្រាវវេជ្ជសាស្ត្រនាវាសហរដ្ឋអាមេ រិកបានប្រមូលសំណាកពីកុមារី ។ តាំងពីមានការអះអាងបញ្ជាក់ថា មានផ្ទុកវីរុស H5N1 នាង ត្រូវបានបញ្ជូនទៅ និងដាក់ឲ្យសំរាកនៅមន្ទីរពេទ្យបង្អែកខេត្តកំពង់ចាមនៅថ្ងៃទី ២០ ខែកុម្ភៈ ឆ្នាំ ២០១៤ និងបានទទួលការព្យាបាលដោយឱសថ Tamiflu នៅថ្ងៃដដែលនោះ ។ នាង បានទទួលការព្យាបាល និងបានជាសះស្បើយ៕
មតិយោបល់