ក្រុមអ្នកជំនាញវេជ្ជសាស្ត្របារាំងសហការជាមួយក្រសួងសុខាភិបាលកម្ពុជា បានផ្តើម បើកការស្រាវជ្រាវ ក្នុងការប្រយុទ្ធប្រឆាំងការរីករាលដាលជំងឺឆ្លងប្រភេទថ្មីៗ នៅក្នុងប្រទេស កម្ពុជា ក៏ដូចជានៅក្នុងតំបន់ ដើម្បីរួមគ្នាទប់ស្កាត់ឲ្យកាន់តែមានប្រសិទ្ធភាព ខ្ពស់ ខណៈដែល ជំងឺឆ្លងទាំងនេះ បាន និងកំពុងចាប់ផ្តើមលេចឡើងក្នុងតំបន់ អាស៊ីអាគ្នេយ៍ នោះ។
នៅក្នុងសន្និសីទអ្នកជំនាញថ្នាក់តំបន់ពីថ្ងៃទី ១១ និងថ្ងៃទី ១២ ខែមីនាឆ្នាំ ២០១៤ នៅ សណ្ឋាគារឡឺរ៉ូយ៉ាល់ ក្នុងរាជធានីភ្នំពេញស្តីពីជំងឺឆ្លង ដែលមានលេចឡើងនៅអាស៊ីអាគ្នេយ៍ ឯកឧត្តមសាស្ត្រាចារ្យ Vincent Deubel នាយកវិទ្យាស្ថានប៉ាស្ទរ័កម្ពុជាមានប្រសាសន៍ថា នេះ ជាការចាប់ផ្តើមពិភាក្សាបន្ទាប់ពីការរុករកឃើញថ្មីលើជំងឺឆ្លងនានា និងមេរោគបង្កជំងឺផ្សេងៗ ដូចជាមេរោគជំងឺគ្រុនឈាម ជំងឺគ្រុនផ្តាសាយធំ ភាពសុំារបស់បាក់តេរី និងជំងឺផ្តាសាយបក្សី ដែលកំពុងកើតឡើងទាំងនៅក្នុងប្រទេសកម្ពុជា និងបណ្តាប្រទេសផ្សេងៗទៀតក្នុងតំបន់ និង ពិភពលោក ។ ឯកឧត្តមថ្លែងថា ការសិក្សាស្រាវជ្រាវផ្នែកវេជ្ជសាស្ត្រ និងកិច្ចសហការរវាង អ្នកជំនាញថ្នាក់ស្រុកតំបន់ និងអន្តរជាតិនាពេលនេះនឹងនាំមកនូវដំណោះស្រាយថ្មីៗ ក្នុងការប្រយុទ្ធប្រឆាំង និងទប់ស្កាត់ការរាតត្បាតឲ្យកាន់តែមានប្រសិទ្ធភាពខ្ពស់ សម្រាប់ ប្រទេស កម្ពុជា និងប្រទេសនៅតំបន់ ។
ឯកឧត្តមនាយកវិទ្យាស្ថានប៉ាស្ទរ័កម្ពុជាបានអះអាងថា កម្ពុជាត្រូវតែមានយន្តការ ការពារ ឲ្យបានជាប់ជាប្រចាំ ដោយសារតែប្រទេសយើងងាយប្រឈមនឹងជំងឺឆ្លង និងការលេច ឡើងនូវមេរោគថ្មីៗ ។ម្យ៉ាងទៀតលទ្ធភាពនៃការសិក្សាស្រាវជ្រាវនៅមានកម្រិតនៅឡើយទាំងធនធាន និងអ្នក
ជំនាញផ្នែកស្រាវជ្រាវនេះ។
ឯកឧត្តមវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាលបានមានប្រសាសន៍ថា កិច្ចពិភាក្សានេះពិតជាមានសារសំខាន់ខ្លាំងណាស់ ខណៈដែលជំងឺប្រភេទថ្មីៗទាំងនេះកំពុង មានវត្តមាននៅក្នុងប្រទេសកម្ពុជា ដោយវាមិនត្រឹមតែធ្វើឲ្យប្រជាពលរដ្ឋឆ្លង នឹងបាត់បង់ ជីវិតប៉ុណ្ណោះទេ ប៉ុន្តែថែមទាំងប៉ះពាល់ដល់វិស័យសេដ្ឋកិច្ចប្រទេសទៀតផង ។ ឯកឧត្តមរដ្ឋ មន្ត្រីបញ្ជាក់ថា ទោះបីជាកម្ពុជាមានកិច្ចខំខិតប្រឹងប្រែងក្នុងការប្រយុទ្ធប្រឆាំងជំងឺទាំងនេះក៏ ដោយ ក៏កម្ពុជានៅតែត្រូវការដំណោះស្រាយថ្មីៗបន្ថែមទៀតពីដៃគូអន្តរជាតិ ដើម្បីធានាឲ្យការ ទប់ស្កាត់ទទួលបានជោគជ័យ។
សូមបញ្ជាក់ថា មកដល់ឆ្នាំ ២០១៤ នេះជំងឺផ្តាសាយបក្សី H5N1 បានកើតឡើង ៥៥ ករណីហើយនៅកម្ពុជា ដែលជាធម្មតាឆ្លងរាលដាលពីបក្សីទៅមនុស្សតាមរយៈ ការទំនាក់ទំនង ដោយផ្ទាល់ ។ ប៉ុន្តែអ្នកជំនាញបារម្ភថា វាអាចនឹងប្រែប្រួលទៅជាទម្រង់ឆ្លង យ៉ាងងាយទៅ កាន់មនុស្ស ដែលអាចឈានទៅដល់ការរាតត្បាតនៅទូទាំងប្រទេសឬពិភពលោកផងដែរ៕
ប្រភព៖ AKP
មតិយោបល់