រាជធានីភ្នំពេញ ៖ រថយន្តហ៊ីយ៉ាន់ដាយ ពណ៌សមួយគ្រឿង ដឹកឥវ៉ាន់ពេញធ្វើដំណើរឆ្ពោះទៅខេត្តរតនគិរី បានបុកប៉ះគ្នាជាមួយរថយន្តស្ទូចបញ្ជាការដ្ឋានកងវិស្វកម្ម មុខផ្សារព្រែកលៀប រងការខូចខាតទាំងសងខាង កាលពីវេលាម៉ោង១០និង៣៥នាទី យប់ថ្ងៃទី៣០ខែមីនាឆ្នាំ២០១៤ នៅតាមបណ្តោយផ្លូវជាតិលេខ៦ ស្ថិតនៅភូមិកៀនឃ្លាំង សង្កាត់ព្រែកលៀប ខណ្ឌឬស្សីកែវ រាជធានីភ្នំពេញ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេឃើញរថយន្តហ៊ីយ៉ាន់ដាយចំណុះ៥តោន ពណ៌ស ពាក់ស្លាកលេខ ភ្នំពេញ 3B-6972 ដឹកសម្ភារៈគ្រឿងទេស ធ្វើដំណើរពីទិសដៅពីត្បូងទៅជើង ឆ្ពោះទៅកាន់ខេត្តរតនះគិរី មកដល់ចំណុចកើតហេតុស្រាប់តែមានរថយន្តស្ទូចពណ៌ត្រេអ៊ី របស់បញ្ជាការដ្ឋានកងវិស្វកម្ម ពាក់ស្លាកលេខ ខេមរៈភូមិន្ទ 01 4-6922 ជិះក្នុងទិសដៅពីជើងទៅត្បូងច្រាសទិសគ្នា មកដល់ចំណុចកើតហេតុ ការដ្ឋានជួលជុលផ្លូវ គឺមានស្លាកសញ្ញាប្រាប់ឱ្យជិះវាងទៅផ្លូវក្រោមដែលជាផ្លូវដី ទើបនិងស្ថាបនា តែរថយន្តស្ទូចនេះមិនព្រមជិះតាម ស្លាកសញ្ញាបង្ហាញទិស នៅតែប្រឹងបើកបញ្ជ្រៀត លើផ្លូវកៅស៊ូជាមួយរថយន្តហ៊ីយ៉ាន់ដាយក៏បានបុកបោកផ្ទប់គ្នា គាបជាប់ទៅមុខលែងរួច បណ្តាលឱ្យរថយន្តទាំង២គ្រឿងដាច់កាឡេមុខដូចគ្នា សល់តែបន្តិចទៀតរថយន្តហ៊ីយ៉ាន់ដាយធ្លាក់ផ្លូវក្រឡាប់បាត់ សំណាងដែលពុំមានមនុស្សរងរបួស។
ក្រោយពេលកើតហេតុរថយន្តទាំង២គ្រឿង ធ្វើចរចារគ្នាមិនត្រូវ សមត្ថកិច្ចក៏បានធ្វើការវាស់វែងអូសយករថយន្តទាំង០២គ្រឿងទៅដោះស្រាយគ្នា នៅការិយាល័យចរាចរជើងគោលស្នងការនរគបាលរាជធានីដើម្បីដោះស្រាយតាមផ្លូវច្បាប់៕
មតិយោបល់