ភ្នំពេញ៖កម្មករ-កម្មការិនីរោងចក្រកាត់ដេរ សេន ចូវ និងរោងចក្រកាត់ដេរ ដា ភ្វាន នាថ្ងៃទី៣ ខែមេសា ឆ្នាំ២០១៤ នេះនៅបន្តពុលដួលសន្លប់ប្រមាណ១១៣នាក់ទៀតហើយ នេះបើកតាមការអះអាងពីសមត្ថកិច្ច។
ករណីពុលសន្លប់កម្មករ-កម្មការិនីរោងចក្រកាត់ដេរទាំងពីរខាងលើនេះត្រូវក្រុមកម្មករ ដូចគ្នារៀបរាប់ប្រាប់ថា គឺបណ្តាលមកពីខាងរោងចក្រផ្តល់អាហារសាច់មាន់ខូចគុណភាព ឲ្យពួកគាត់ហូបកាលពីថ្ងៃទី១ ខែមេសា ឆ្នាំ២០១៤ មកម្ល៉េះ បន្ទាប់ពីហូបហើយ ពួកគាត់មានអការៈវិលមុខ ចុកពោះ រាគ ក្អួតចង្កោរ ស្ទើរគ្រប់ៗគ្នា ប៉ុន្តែអ្នកណាហូបច្រើនជាងគេ គឺ អ្នកនោះចុកពោះ វិលមុខ រាគរួសខ្លាំងជាងគេ ទាល់តែចាក់ថ្នាំ ដាក់សេរ៉ូម ទើបជាសះស្បឿយ ឡើយវិញ។
ប្រភពព័ត៌មានពីកម្មការិនីដដែលប្រាប់បន្តឲ្យដឹងថា កាលពីថ្ងៃត្រង់ ថ្ងៃទី១ ខែមេសា ឆ្នាំ២០១៤នោះ គឺខាងរោងចក្របានផ្តល់អាហារឲ្យពួកគាត់ហូបដូចធម្មតា ដោយគ្រាន់តែប្លែកថា អាហារនោះមានលក្ខណៈសម្បូរហូរហ៊ាជាងថ្ងៃធម្មតា គឺសាច់មាន់កាប់ដាក់ទាំងចានៗប៉ុន្តែមិនមានទឹកជ្រលក់នោះទេ និងសម្លរខជើងជ្រូកតៅហ៊ូ លុះពេលហូបហើយថ្ងៃរសៀលបន្តិច ស្រាប់តែម្នាក់ៗមានអការៈចុករមូលក្នុងពោះ រកកល់ចង់ខ្យល់បន្តិច ចង់ក្អួតបន្តិច រហូតដល់កណ្តាលអធ្រាត្រម្នាក់ៗចុក រាគ ក្អូត សឹងតែដេកមិនលក់។
ព័ត៌មានខាងលើប្រាប់បន្ថែមថា លុះដល់វេលាម៉ោង៧ព្រឹក ថ្ងៃទី២ ខែមេសា ឆ្នាំ២០១៤ ពួកគាត់បានចូលមកធ្វើការធម្មតា ស្រាប់តែវេលាម៉ោងប្រហែល៨ទៅ៩ ពួកគាត់ មានអការៈ ចុករមូលក្នុងពោះ វិលមុខកាន់តែខ្លាំងឡើងៗ ក៏ដួលសន្លប់ជាបន្តបន្ទាប់នៅពេលកំពុងបំពេញការងារ ហើយត្រូវបានរថយន្តសាមុយដឹកយកសង្គ្រោះបន្ទាន់នៅមន្ទីរពេទ្យ ចាក់ថ្នាំ ព្យួរសេរ៉ូម លេបថ្នាំ ទើបធ្វើឲ្យអការៈទាំងនេះធូរស្រាលឡើងវិញ។
ករណីពុលដួលសន្លប់ទាំងនេះត្រូវបានក្រុមកម្មករសន្និដ្ឋានថា គឺបណ្តាលមកពីអាហារមិនល្អ សាច់មាន់ខូចគុណភាព ហើយនៅពេលហូបទៅសាបៗ គ្មានរសជាតិនោះទេ ដែលករណីនេះ គឺជាលើកទី១ ហើយដែលពួកគាត់ជួបប្រទះ ហូបបាយហើយស្រាប់តែម្នាក់ៗចុកពោះ វិលមុខ ក្អួត រាគ បែបនេះ ។ ដូច្នេះដើម្បីកុំឲ្យកើតមានករណីនេះបន្តទៀត សូមក្រសួងមន្ទីរ ពាក់ព័ន្ធ មេត្តាជួយចុះត្រួតពិនិត្យមើលផង តើករណីដែលបណ្តាលឲ្យកម្មកររោងចក្រជាច្រើននាក់ ចុកពោះ វិលមុខ ក្អួត រាគរួសបែបនេះ គឺបណ្តាលមកពីអាហារមិនល្អ ឬបណ្តាលមកពីបរិយាកាសនៅក្នុងរោងចក្រមិនល្អ។
សូមបញ្ជាក់ថា រោងចក្រកាត់ដេរ សេន ចូវ និងរោងចក្រកាត់ដេរ ដា ភ្វាន នេះ គឺមានទីតាំងស្ថិតនៅភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ ហើយបន្ទាប់ពីមានការពុលដួលសន្លប់របស់កម្មករ នៃរោងចក្រទាំងពីរនេះរួចមក ទើបព្រឹកថ្ងៃទី៣ ខែមេសា ឆ្នាំ២០១៤ សមត្ថកិច្ចបានបង្កើតគណៈកម្មការចម្រុះចុះបើកការត្រួតពិនិត្យ ដោយសន្និដ្ឋានថា ករណីដួលសន្លប់របស់កម្មករ-កម្មការិនី ជាច្រើននាក់នេះ គឺបណ្តាលមកពីការពុលអាហារសាច់មាន់៕
មតិយោបល់