អង់គ្លេស​៖​អ្នកចាត់ការទូទៅ ​របស់ក្លិបហង្សក្រហម Liverpool លោក Brendan Rodgers មិនច្បាស់ ថាតើ ខ្សែប្រយុទ្ធ Daniel Sturridge នឹង​បង្ហាញខ្លួនលេង នៅរាត្រីយប់ថ្ងៃចន្ទ ​ក្នុងក្របខណ្ឌ Premier League ដោយប៉ះជាមួយនឹង Crystal Palace ។

កីឡាករវ័យ ២៤ ឆ្នាំ រូបនេះ រកគ្រាប់បាល់បាន ២០ គ្រាប់ នៅក្នុងចំណោម ២៧ ប្រកួត ​ក្នុងរដូវកាលនេះ ។ ក៏ប៉ុន្តែ ខណៈដែល កីឡាករ Daniel Sturridge ជួយឲ្យហង្សក្រហម​យកឈ្នះ Manchester City ដោយលទ្ធផល ៣ – ២ ​កាលពីថ្ងៃទី ១៣ ខែ មេសា ក៏ជាពេលដែលរងរបួសសរសៃពួរផងដែរ​។​

ក្រោយមកទៀត Daniel Sturridge ក៏​អវត្តមាន ដែលក្លិបខ្លួន បំបាក់ Norwich City ក្នុងលទ្ធផល ៣ – ២ ហើយ មិនអាចលេង​ ខណៈដែលក្លិបខ្លួនចាញ់ ក្លិបតោខៀវ ២ – ០ ផងដែរ កាលពីសប្តាហ៍​កន្លងទៅ​។​

តែទោះជាយ៉ាងណា កីឡាកររូបនេះ សង្ឈឹមថាអាចនឹង​លេង លើកទី ២៨ របស់ខ្លួន នៅ Selhurst Park ។​
Brendan Rodgers បានប្រាប់ដល់ BBC ថា “ពេលនេះ គាត់ ​បាន​ជាសះស្បើយ​ជាច្រើន​ និងល្អប្រសើរ ក៏ប៉ុន្តែនៅមិនទាន់ច្បាស់ថា អាចដាក់គាត់លេងឬយ៉ាងណានៅថ្ងៃចន្ទ​” ។​

បច្ចុប្បន្នកាលនេះដែរ ហង្សក្រហម​ស្ថិតនៅលេខរៀងទី ១ ក្នុងក្របខណ្ឌ Premier League ជាមួយនឹងពិន្ទុ ៨០ ក្នុងចំណោម ៣៦ ប្រកួត ។ តែ​ទោះជាយ៉ាងណា នៅយប់ថ្ងៃចន្ទ ហង្សក្រហម នឹងចាប់ផ្តើម​ក្នុងលេខរៀងទី ៣ ​ប្រសិន មេឃខៀវ ឈ្នះ Everton នៅយប់ថ្ងៃសៅរ៍ និង តោខៀវ បំបាក​ Norwic នៅរសៀលថ្ងៃ​អាទិត្យ ។​
បើសិនជា ហង្សក្រហម ឈ្នះ Crystal Palace វិញ ​ហង្សក្រហមនឹង​ឡើង ទៅកាន់​តារាងលេខ ១ វិញ តែបើសំណាងមិនល្អ ជាក់ណាស់ តារាងលេខ ៣ ជារបស់ខ្លួន ៕​