សៀមរាប៖ មានគ្រោះថ្នាក់ ចរាចរណ៍មួយបានកើតឡើង រវាងរថយន្ដកាម៉ារីឆ្លាម ជាមួយម៉ូតូអូសរ៉ឺម៉កដឹកស្រូវ នៅវាលាម៉ោងប្រមាណ ៩ និង ៣០នាទីព្រឹក ថ្ងៃទី០៧ ខែឧសភា ឆ្នាំ២០១៤ ម្សិលមិញនេះ។
គ្រោះថ្នាក់នេះ បានបណ្ដាលឲ្យអ្នកបើកម៉ូតូអូសរ៉ឺម៉ក ឈ្មោះ កែវ វណ្ណៈ មានអាយុ ៤៣ឆ្នាំ បច្ចុប្បន្នរស់នៅភូមិ ត្រពាំងសេះ សង្កាត់គោកចក ក្រុងសៀមរាប បាក់ជើងស្ដាំលើក្បាលជង្គង់ធ្ងន់ធ្ងរ ដែលត្រូវយកទៅ សង្គ្រោះនៅមន្ទីរពេទ្យខេត្តសៀមរាប ចំណែកឯរថយន្ដដឹក ឈើគ្រញូង ត្រូវឆេះសន្ធោរសន្ធៅ ។ ក្នុងហេតុ ការណ៍គ្រោះថ្នាក់ចរាចរណ៍នេះ ក្រៅពីម្ចាស់ម៉ូតូអូសរ៉ឺម៉ក បានបាក់ជើង ហើយរថយន្ដបានទៅបុកដើម ឈើ អាកាស្យា មួយដើម ធ្វើឲ្យរថយន្ដឆេះសន្ធោរសន្ធៅជាង៣ម៉ោង បណ្ដាលឲ្យនៅសល់ តែគ្រោងឆ្អឹង ដែករថយន្ដតែប៉ុណ្ណោះ ចំណែកអ្នកបើកបររថយន្ដ បានរត់បាត់ស្រមោល នៅពេលភ្លាមៗនោះផងដែរ ។
ពេលឆេះរថយន្ដទើបអ្នកស្រុក និងសមត្ថកិច្ចដឹងថា រថយន្ដនោះ ជារថយន្ដដឹកឈើគ្រញូង ព្រោះឈើ គ្រញូងទាំងអស់នោះ បានឆេះ ក្លាយជាធ្យូងស្ទើរទាំងស្រុង ។ អ្នកស្រុក និងសមត្ថកិច្ចមូលដ្ឋានបាននិយាយ ថា ឈើគ្រញូងទាំងជាង ២០ដុំនោះ ទំនងដឹកចេញពីតំបន់ព្រៃស្អាក នៃស្រុកអន្ទង់វែង ឬ អាចមកពី តំបន់ព្រំដែន ឬ តំបន់ព្រះវិហារ ព្រោះរថយន្ដនោះ បានធ្វើដំណើរមកពីទិសខាងជើង សំដៅចូលក្រុងសៀមរាប៕
មតិយោបល់