ភ្នំពេញ ៖ បុរសម្នាក់បានស្លាប់បាត់បង់ជីវិតនិង២នាក់ទៀតរបួសធ្ងន់និងស្រាលដោយសារតែរ៉ឺម៉កទឹកទឹកកកក្រឡាប់បោកផ្ទប់និងថ្នល់ ខណៈពេលអ្នកបើកចាប់ហ្វ្រាំងបង្ខំ ស្របពេលមានរថយន្តមួយគ្រឿងបើកឆ្លងកាត់ពីមុខ ដែលហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ៨និង៣៥នាទីយប់ថ្ងៃទី១៥ខែឧសភាឆ្នាំ២០១៤ នៅចំណុចមុខក្លោងទ្វារចូលបុរីពិភពថ្មី តាមផ្លូវជាតិលេខ៥ ស្ថិតនៅក្នុងសង្កាត់គីឡូម៉ែត្រលេខ៦ ខណ្ឌឬស្សីកែវ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញរ៉ឺម៉កម៉ូតូដឹកទឹកកកមួយគ្រឿង មិនមានដឹកទឹកកកទេ ជិះគ្នា៣នាក់ គោលបំណងទៅរកទិញម្ហូប តាមបណ្ដោយផ្លូវជាតិលេខ៥ ក្នុងទិសដៅ ពីជើងទៅត្បូងក្នុងល្បឿនលឿន ខណៈមកដល់ចំណុចកើតហេតុក៏មានរថយន្តមួយគ្រឿង ពណ៌ស មិនចាំម៉ាកបើកតាមផ្លូវជាតិលេខ៥ ក្នុងទិសដៅពីត្បូងទៅជើងបញ្ច្រាសទិសគ្នា បានបត់យ៉ាងលឿនចូលក្នុងបុរីពិភពថ្មី ហើយក៏បានវ៉ាក់អឺជាមួយរ៉ឺម៉កម៉ូតូ ស្រាប់តែអ្នកបើករ៉ឺម៉កម៉ូតូអកស័របានចាប់ហ្វ្រាំងទាំងបង្ខំបណ្តាលឱ្យរ៉ឺម៉កម៉ូតូក្រឡាប់បោកផ្ទប់និងថ្នល់បណ្ដាលអោយអ្នកជិះពីក្រោយ២នាក់បោកទៅនិងថ្នល់ស្លាប់ម្នាក់និងម្នាក់ទៀតសន្លប់នៅនិងកន្លែង ចំណែកអ្នកបើករ៉ឺម៉កម៉ូតូរងរបួសស្រាល។
បន្ទប់ពីកើតហេតុអ្នកបើករថយន្តបានបើករថយន្តចូលទៅក្នុងបុរីពិភពថ្មីបាត់ទៅ ចំណែកជនរងគ្រោះត្រូវបានរថយន្តសាមុយដឹកទៅសង្គ្រោះនៅគ្លីនិកឯកជនភ្លាមៗ ។
ក្រោយពេលកើតហេតុសមត្ថកិច្ចបានចុះមកត្រួតពិនិត្យនិងធ្វើការវាស់វែងកន្លែងកើតហេតុផង និងបានទំនាក់ទំនងទៅគ្រួសារសពដើម្បីមកទទួលយកទៅរៀបចំធ្វើបុណ្យតាមប្រពៃណី៕
មតិយោបល់