ភ្នំពេញ ៖ យុវជន២នាក់បានជិះម៉ូតូមួយគ្រឿងក្នុងល្បឿនលឿនបានជ្រុលមកបុកម៉ូតូកង់៣ដែលចតស្ងៀមបណ្ដាលអោយរងការខូចខាតដោយសារតែពួកគេភ័យខ្លាំងពេកជិះម៉ូតូគេចពីគេដេញវ៉ៃ កាលពីវេលាម៉ោង១និង០០នាទីរំលងអាធ្រាត្រឈានចូលថ្ងៃទី២៧ខែឧសភាឆ្នាំ២០១៤ នៅចំណុចផ្លូវ២១៥ ក្នុងសង្កាត់វាលវង់ ខណ្ឌ៧មករា។
យោងតាមប្រភពព័ត៌មានពីកន្លែងកើតហេតុបានអោយដឹងថា គេបានឃើញក្មេងស្ទាវមួយក្រុមជិត១០នាក់បានជិះម៉ូតូដេញតាមនិងវាយយុវជន២នាក់ដែលជិះម៉ូតូមួយគ្រឿងម៉ាកហុងដាស្កុបពី ពណ៌សលាយទឹកក្រូច ដែលជិះក្នុងល្បឿនយ៉ាងលឿនតាមបណ្ដោយផ្លូវ២១៥ ទិសដៅពីត្បូងទៅជើង ខណៈមកដល់ចំណុចកើតហេតុខាងលើ ដោយសារជិះម៉ូតូក្នុងស្ថានភាពភ័យស្លន់ស្លោពេក ក៏បានជ្រុលចង្កូតទៅបុកពីក្រោយរ៉ឺម៉កម៉ូតូកង់៣មួយគ្រឿងដែលកំពុងចតស្ងៀមក្បែរចិញ្ចើមផ្លូវធ្វើអោយម៉ូតូរ៉ឺម៉កកង់៣ កំពិតផ្នែកខាងក្រោយរងការខូចខាត ហើយម៉ូតូស្កូពីវិញក៏ខ្ទេចខូចខាតផ្នែកខាងមុខដូចគ្នាតែមិនបណ្ដាលអោយអ្នកជិះម៉ូតូស្កូបពីនេះរងរបួសឡើយ។
បន្ទាប់ពីកើតហេតុក្រុមក្មេងស្ទាវដែលបានដេញវាយយុវជន២នាក់នោះ ឃើញដូចនេះក៏បានជិះម៉ូតូគេចខ្លួនទៅបាត់តែម្ដង។ ក្រោយកើតហេតុម្ចាស់ម៉ូតូបានសុំទោសនិងម្ចាស់រ៉ឺម៉កកង់៣រួមចេញថ្លៃខូចខាតដើម្បីបញ្ចប់រឿង៕
មតិយោបល់