ព្រាប សុវត្ថិ នឹកឃើញ ៥ បទ នឹកដល់ម្ចាស់

ក្រោយការខ្ទប់រាំងជល់ ចេញបទចម្រៀងលើទីផ្សារ ហាក់ដូចជាមិនសូវទទួលបានការគាំទ្រដូចកាលប៉ុន្មានឆ្នាំ មុន បានធ្វើឲ្យសន្ទុះនៃប្រជាប្រិយភាពរបស់ កំពូលតារាចម្រៀង ព្រាប សុវត្ថិ បានធ្លាក់ចុះ បើទោះបីជាងារ កំពូលតារាច្រៀង ដោយនៅតែគេផ្តល់ឲ្យ និង ហៅមកទល់នឹងពេលបច្ចុប្បន្ន ។

បើធៀបនឹង ប្រជាប្រិយភាព កាលពីប៉ុន្មានឆ្នាំមុន សន្ទុះគាំទ្រ ព្រាប សុវត្ថិ ពិតជាកក្រើកទូទាំងប្រទេស លើវិស័យឧស្សាហកម្មកម្សាន្ត ដោយចេញបទ ចម្រៀងអ្វីក៏នៅតែល្បី មិនដូចនឹងស្ថានភាពពេលនេះ នោះឡើយ ។ ប្រិយមិត្តខ្លះ ជាក់ក្នុងចិត្តណាស់ នឹងឆ្លើយតប នឹងសួរថា ហេតុអ្វីបានជាហានថា និងចុះផ្សាយយ៉ាងនេះ ? បើ កំពូលតារាចម្រៀង ព្រាប សុវត្ថិ នៅតែល្បី និងទទួលបានការគាំទ្រ យ៉ាងនេះ ។ ការនិយាយ និងចុះផ្សាយ បែបនេះ មិនមែនបង្អាប់នោះទេ គឺសំអាង ទៅលើបទ ចម្រៀង ចេញប៉ុន្មានឆ្នាំចុងក្រោយ ដោយមិនទទួលបានការគាំទ្រ ពីសំណាក់ ប្រិយមិត្ត នៅតាមបណ្តាខេត្ត នោះទេ ជាពិសេស នៅឆ្នាំនេះតែម្តង វ៉ុលចូលឆ្នាំ របស់ ហង្សមាស មិនអាចបំបែក វ៉ុលដ៏មានប្រជាប្រិយភាព ផលិតកម្ម ថោនបានឡើយ និងក្រៅពីវ៉ុលចូលឆ្នាំក៏មិនសូវជាមានសន្ទុះគាំទ្រដូចគ្នា បើទោះបីជាមានវត្តមាន ព្រាប សុវត្ថិ ក្នុងអាលប៊ុម ក៏ដោយ ។

នៅចំណុចនេះ ក្នុងមជ្ឈដ្ឋានអ្នកសិល្បៈដូចគ្នា បាននាំគ្នានិយាយខ្សឹបខ្សៀវថា ” បង សុវត្ថិ ពិតជាសន្ទុះរាងធ្លាក់ចុះ មិនដូចជាប៉ុន្មានឆ្នាំមុននោះទេ គាត់ពិតជាល្បីល្បាញខ្លាំងណាស់ និងជាហេតុធ្វើឲ្យគាត់នឹងដល់រឿងចាស់ ” ។ ប្រភពបានបន្តថា “បងសុវត្ថិ មិនដែលភ្លេចនោះទេ ជាមួយនឹងចម្រៀង ៥ បទ ក្នុងចំណោមបទ ជាច្រើន ដែលធ្វើឲ្យគាត់ល្បីល្បាញ ដោយនឹកឃើញចំណងជើង នឹកឃើញដល់ម្ចាស់ តែងនិពន្ធ ទំនុកច្រៀង ដោយលេបខាយ ពាក្យសម្តី ក្នុងទំនុកច្រៀងល្អឥតខ្ជោះ នោះគឺ កវីនិពន្ធដែលបានចែកឋានទៅកាន់លោកខាងមុខ ជុំ ប៊ុនធឿន ។ បទ លោក ជុំ ប៊ុនធឿន ដែលធ្វើឲ្យ ព្រាប សុវត្ថិ មិនភ្លេច គឺមានបទ “១. ថ្នម ២. គោះទ្វារបេះដូង ៣. ខ្លុយស្នេហ៍ត្នោតទេរ ៤. ចន្ទ មិនស្តាយរស្មី ៥. ថ្ងៃបាក់រសៀល និងមានបទចម្រៀង ជាច្រើនទៀត ដែលជាស្នាដៃនិពន្ធទំនុកច្រៀង ដ៏សម្រិតសម្រាំងពី កវីរូបនេះជូន ព្រាប សុវត្ថិ “។ ប្រភពបន្ថែមទៀតថា “ក្នុងអំឡុងពេលចេញបទ ទាំងនេះហើយ កេរ្តិ៍ឈ្មោះ បង ព្រាប សុវត្ថិ បានស្ថិតនៅកប់ពពក ដោយមិនមានតារាចម្រៀង ប្រុសណាអាច ធៀបបានឡើយ ក៏ប៉ុន្តែពេលនេះវាខុសពីពេលមុន ដោយមាន ខេមរៈ សីរីមន្ត កំពុងប្រជែងទាំងតម្លៃខ្លួន និងកេរ្តិ៍ឈ្មោះ ខណៈ បងសុវត្ថិ កាន់តែជ្រេ ស្របពេលដែលខាងផលិតកម្ម ជិះសេះលែងដៃ គិតរឿងទូរទស្សន៍ជារឿងសំខាន់ជាង” ។

យើងសង្កេតឃើញថា ប៉ុន្មានឆ្នាំចុងក្រោយមកនេះ ហង្សមាស និង រស្មីហង្សមាស មិនសូវជាមានសន្ទុះ ខណៈដែលផលិតកម្ម ស្រករក្រោយ និង អាយុ ប្រហាក់ប្រហែលគ្នា បានធ្វើការប្រកួត ប្រជែងដណ្តើម ទីផ្សារ ពីផលិតកម្ម ទ្រនំធំ របងខ្ពស់ហង្សមាស ដោយបង្ហាញពីមហិច្ចតារបស់ខ្លួន ល្បួងតារាចម្រៀងល្បីៗចូលផលិតកម្ម ខ្លួន ក្នុងនោះមាន សាន់ដេ និង ផលិតកម្ម ថោន ដែលជាគូប្រជែងដ៏សំខាន់សម្រាប់ ហង្សមាស៕
ទស្សនាបទចម្រៀង ៥ បទដូចខាងក្រោមនេះ ៖
១. ថ្នម