ភ្នំពេញ ៖ ជនសង្ស័យ២នាក់បានធ្វើសកម្មភាពឆក់កាបូបនារីម្នាក់ដែលព្យួរចោលនៅលើដៃម៉ូតូ តែមិនបានសម្រេចត្រូវបានសមត្ថកិច្ចឃាត់ខ្លួននិងបញ្ជូនទៅប៉ុស្តិ៍នគរបាលរដ្ឋបាលចតុមុខដើម្បីធ្វើការសាកសួរ ។ ហេតុការណ៍នេះបានកើតឡើងកាលពីវេលាម៉ោង៧និង២៥នាទី យប់ថ្ងៃទី២៧ខែឧសភាឆ្នាំ២០១៤ ស្ថិតនៅក្នុង សង្កាត់ចតុមុខ ខណ្ឌដូនពេញ។
ប្រភពព័ត៌មានបានឱ្យដឹងថានៅមុនពេលកើតហេតុ មាននារីម្នាក់បានឈប់ម៉ូតូម៉ាកអាយខុន ពណ៌ទឹកក្រូចលាយសក្រហម ហើយបានចុះទៅញ៉ាំពងទាកូនដោយទុកកាបូបស្ពាយដែលដាក់សម្ភារៈសិក្សានៅព្យួរចោលនៅនិងដៃម៉ូតូ ខណៈនោះស្រាប់តែមានជនសង្ស័យ២នាក់ជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ អត់មានស្លាកលេខ បានជិះមកធ្វើសកម្មភាព ដោយជនសង្ស័យម្នាក់បានចុះពីលើម៉ូតូឆក់កាបូបនោះរត់គេច តែចៃដន្យនារីរងគ្រោះឃើញទាន់ក៏រត់ទៅប្រទាញប្រទង់គ្នាយកកាបូបពីជនសង្ស័យ ហើយក៏មានបុរសម្នាក់បានទាញដំបងនៅក្បែរនោះ ទៅសំពងលើជនសង្ស័យទាំង២នាក់ ព្រមទាំងចាប់ខ្លួនប្រគល់ឱ្យសមត្ថកិច្ច។
ក្រោយពេលកើតហេតុសមត្ថកិច្ចបានបញ្ជូនខ្លួនជន សង្ស័យឆក់កាបូបទាំង០២នាក់ទៅកាន់ប៉ុស្តិ៍នគរបាលរដ្ឋបាលចតុមុខ ដើម្បីសួរនាំរួចបញ្ចូនបន្តទៅកាន់អធិការដ្ឋាននគរបាលខណ្ឌដូន ពេញកសាងសំណុំរឿងចាត់ការតាមនីតិវិធីច្បាប់ ៕
មតិយោបល់