ភ្នំពេញ ៖ យុវជន០២នាក់រងរបួសធ្ងន់និងយុវជនម្នាក់ទៀតរងរបួសស្រាលខណះ ជិះម៉ូតូមួយគ្រឿងគ្នា០៣នាក់ជ្រុលចង្កូតទៅបុករថយន្តឡិសស៊ីស ៤៧០ ដែលបើកឆ្លងផ្លូវចំពីមុខចំហៀងខាងស្តាំរថយន្តពេញទំហឹង ។ ហេតុការណ៍នេះកើតឡើងនៅវេលាម៉ោង១០និង៣០នាទីយប់ ថ្ងៃទី២៧ ឧសភា ២០១៤ នៅចំណុចស្តុប០៧ ស្ថិតនៅក្នុងសង្កាត់ទឹកថ្លា ខណ្ឌសែនសុខ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេឃើញម៉ូតូស្មាសវី ពណ៌ខ្មៅមួយគ្រឿង ពាក់ស្លាកលេខ កណ្តាល 1Q-5503 ជិះដោយយុវជន០៣នាក់ តាមផ្លូវសហពន្ធ័រុស្ស៊ី ក្នុងទិសដៅពីលិចទៅកើត ស្រាប់តែមកដល់ចំណុចកើតហេតុ ក៏បានជ្រុលចង្កូតទៅបុក រថយន្តឡិចស៊ីស៤៧០មួយគ្រឿង ពណ៌ខ្មៅ ពាក់ស្លាកលេខភ្នំពេញ 2I-2359 បើកបរដោយបុរសម្នាក់ តាមផ្លូវភ្នំពេញ-ហាណូយ ក្នុងទិសដៅពីជើងទៅត្បូង កំពុងឆ្លងផ្លូវចំពីមុខចំហៀងខាងស្តាំរថយន្តពេញ ទំហឹងបណ្តាលឱ្យរបួសធ្ងន់ស្រាល០៣នាក់ ម៉ូតូរងការខូចខាតយ៉ាងដំណំ ចំណែករថយន្តខូចខាតកំណាត់មុខខាងស្តាំ។
ក្រោយពេលកើតហេតុជនរងគ្រោះត្រូវបានរថយន្ត សាមុយដឹកយកទៅសង្គ្រោះនៅមន្ទីរពេទ្យ ចំណែករថយន្តនិងម៉ូតូសមត្ថកិច្ចធ្វើការវាសវែង និងបានយកទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីដោះស្រាយគ្នាតាមនិតិវិធីច្បាប់៕
មតិយោបល់