ភ្នំពេញ ៖ យុវជនម្នាក់ដែលអាងខ្លួនឯងជាកូនអ្នកសំបូរលុយចាយលែងអស់ហើយអាងអំណាចគ្រាន់តែគេបើករថយន្តពីក្រោយហើយស៊ីផ្លេ ខឹងគេក៏ជិះម៉ូតូយកដុំថ្មទៅគប់លើរថយន្តគេបណ្ដាលអោយខូចខាតហើយព្យាយាមជិះម៉ូតូគេចខ្លួន ត្រូវបានសមត្ថកិច្ចដេញតាមនិងឃាត់បានកាលពីវេលាម៉ោង១០និង៥០នាទីយប់ថ្ងៃទី២៧ខែឧសភាឆ្នាំ២០១៤ នៅចំណុចផ្លូវលេខ៥១កែងនិងផ្លូវ១១៤ ក្នុងសង្កាត់ផ្សារថ្មី១ ខណ្ឌដូនពេញ ក្រោយមន្ទីរពេទ្យព្រះអង្គឌួង។
បើតាមសម្ដីម្ចាស់រថយន្តសុំមិនបញ្ចេញឈ្មោះបានអោយដឹងថា រូបគាត់បានបើករថយន្តមួយគ្រឿងម៉ាកតូយ៉ូតា ហៃឡែនឌ័រ ពណ៌ស ពាក់ស្លាកលេខ ភ្នំពេញ 2K-7875 ដែលគាត់បានជិះធ្វើដំណើរតាមបណ្ដោយផ្លូវព្រះមុនីវង្សក្នុងទិសដៅពីជើងទៅត្បូង ស្រាប់តែមកដល់ចំណុចមុខមន្ទីរពេទ្យកាល់ម៉ែត គាត់ក៏បានឃើញយុវជនម្នាក់បានជិះម៉ូតូមួយគ្រឿងម៉ាកហុងដាឌ្រីម ធុនសេ១១០ ពណ៌ទឹកប៊ិច ភ្នំពេញ 1BF-7778 ហើយនិងមានបិតតែមឡូហ្គោប៉ូលិសថែមទៀតផង បានជិះធ្វើដំណើរពីមុខរថយន្តរបស់គាត់ហើយខណៈនោះ គាត់ក៏បានស៊ីផ្លេអោយម៉ូតូដែលនៅពីមុខរថយន្តគាត់អោយអែបគៀនដើម្បីគាត់ធ្វើដំណើរទៅមុខ តែយុវជនដែលជិះម៉ូតូនោះហាក់ដូចជាមួរម៉ៅក៏បានស្រែកជេរគាត់ហើយក៏អែបម៉ូតូគៀនអោយរថយន្តគាត់បន្តទៅមុខទៀត ខណៈនោះគាត់ក៏បានបន្តដំណើរទៅមុខទៀត រហូតមកដល់ផ្លូវលេខ១១៤ កែងនិងផ្លូវលេខ៥១ ក៏យុវជនដែលជិះម៉ូតូនោះយកដុំថ្មមួយដុំមកគប់រថយន្តគាត់ចំទ្វារខាងក្រោយផ្នែកខាងឆ្វេងបណ្ដាលអោយក្រពិតដាច់ថ្នាំរថយន្ត សំណាងមិនបែកកញ្ចក់រថយន្ត ហើយភ្លាមៗនោះយុវជននេះបានជិះម៉ូតូព្យាយាមគេចខ្លួនដោយសំណាងអាក្រក់ប្រទះជួបជាមួយសមត្ថកិច្ចកំពុងជិះម៉ូតូល្បាតក៏ធ្វើការដេញតាមចាប់ប្រផាប់ប្រភីង រហូតមកដល់ចំណុចក្បែរនិងស្ថានទូតអង់គ្លេសដែលជាផ្លូវទាល់យុវជននោះក៏ត្រូវសមត្ថកិច្ចឃាត់ខ្លួនរួមទាំងម៉ូតូបានភ្លាមៗផងដែរ។បន្ទាប់ពីកើតហេតុកម្លាំងសមត្ថកិច្ចនៃប៉ុស្ដិ៍នគរបាលផ្សារថ្មីមួយបានធ្វើការឃាត់ខ្លួនយុវជនដែលអាងអំណាចនិងលុយរបស់ខ្លួននេះមកធ្វើការដោះស្រាយជាមួយម្ចាស់រថយន្តនៅប៉ុស្ដិ៍នគរបាលផ្សារថ្មី១ ដើម្បីដោះស្រាយគ្នា។
គួរបញ្ជាក់ផងដែរថា ដោយភាគីខាងម្ចាស់រថយន្តមិនចង់មានរឿងវែងឆ្ងាយក៏ព្រមបញ្ចប់រឿងគ្រាន់តែយករថយន្តរបស់ខ្លួនទៅជួសជុលដោយយកសំណងពីភាគីបង្កបន្តិចបន្តួចតែប៉ុណ្ណោះ៕
មតិយោបល់