កំពូលតារាចក្បាច់គុណចិន លោក លី លានជា (Jet Li) ត្រូវបានក្រុមហ៊ុន Alibaba Group Holding ជ្រើសតាំងជាប្រធានក្រុមប្រឹក្សាភិបាលក្រុមហ៊ុន ChinaVision Media Group ដែលត្រូវជាបុត្រសម្ព័ន្ធរបស់ Alibaba Group Holding ។
ChinaVision Media Group ជាក្រុមហ៊ុនផលិតខ្សែភាពយន្តរបស់ចិន ដែលត្រូវបានក្រុមហ៊ុន Alibaba Group Holding ទិញភាគហ៊ុនចំនួន ៦០ភាគរយ កាលពីខែមីនា ឆ្នាំ ២០១៤ ក្នុងតម្លៃ ៨០៤លានដុល្លារអាមេរិក។
នៅក្នុងសេចក្ដីប្រកាសរបស់ ក្រុមហ៊ុន Alibaba បានឲ្យដឹងថា Alibaba ចង់ពង្រីកវិស័យភាពយន្តឲ្យកាន់តែប្រសើរឡើងថែមមួយកម្រិតទៀត ដើម្បីប្រកួតប្រជែងជាមួយនឹងភាពយន្តបរទេស ហើយលោក លី លានជា គឺជាតារាសម្ដែងដែលជាប់ចំណាត់ថ្នាក់ល្អនៅក្នុងពិភពហូលីវ៉ូដ ដូច្នេះសមត្ថភាព ក្នុងការដឹកនាំរបស់លោក ជឿជាក់ថា នឹងធ្វើឲ្យភាពយន្តចិនកាន់តែរីកចម្រើនថែមទៀត។
គួរបញ្ជាក់ផងដែរថា លី លានជា ជាកំពូលតារាក្បាច់គុណចិន ដែលមានឈ្មោះល្បីល្បាញ ជាមួយនឹងទេពកោសលក្បាច់គុណ ដែលមានប្រវត្តិចេញពីអារាមសៅលិញ៕
មតិយោបល់