ភ្នំពេញ ៖ រថយន្តកាមរីឆ្លាមមួយគ្រឿងបើកបត់ឆ្លងផ្លូវ ក៏ត្រូវម៉ូតូវីវ៉ា ធុនសេ១២៥ បុកចំ ពេញទំហឹង បណ្តាលឱ្យម៉ូតូរងការខូចខាតខ្ទេចមួយកំណាត់មុខ សំណាងល្អមនុស្សមិនមានរងរបួស ចំណែករថយន្តបើកចូលទៅក្នុងមជ្ឈមណ្ឌលស្ពាក ចតទុកចោល ហេតុការណ៍នេះកើតឡើងកាលពីវេលាម៉ោង១១ និង៤០នាទីយប់ថ្ងៃទី៤ខែមិថុនាឆ្នាំ២០១៤ នៅចំណុចមុខមជ្ឈមណ្ឌលស្ពាក តាមផ្លូវម៉ៅសេទុង ស្ថិតក្នុងសង្កាត់ទួលស្វាយព្រៃ២ ខណ្ឌចម្ការមន។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុមានរថយន្តកាមរីឆ្លាមមួយគ្រឿង ពណ៌ស្ករ ពាក់ស្លាកលេខភ្នំពេញ 2C-2166 បើកបរតាមបណ្ដោយផ្លូវម៉ៅសេទុង ក្នុងទិសដៅពីត្បូងទៅជើងមកដល់ចំណុចកើតហេតុរថយន្តបានបត់ឆ្វេងចូលទៅក្នុងមជ្ឍមណ្ឌលស្ពាក ក៏មានម៉ូតូមួយគ្រឿងម៉ាក ស៊ុយស៊ូគីវីវ៉ា ធុនសេ១២៥ ពណ៌ខ្មៅ ពាក់ស្លាកលេខភ្នំពេញ 1AY-2833 បើកបរដោយយុវជនម្នាក់ឈ្មោះ ទី វណ្ណតាយ ភេទប្រុស អាយុ១៩ឆ្នាំ ស្នាក់នៅក្នុងសង្កាត់ ផ្សារដេប៉ូ២ ខណ្ឌទួលគោកតាមបណ្ដោយផ្លូវម៉ៅសេទុងក្នុងទិសដៅពីជើងទៅត្បូង បណ្ដាលឲ្យ ម៉ូតូបុកចំពេញទំហឹង ធ្វើឲ្យម៉ូតូរងការខូចខាតខ្ទេចមួយកំណាត់មុខសំណាងល្អមនុស្សគ្រាន់តែ រងរបួសស្រាល ចំណែករថយន្តកាមរីឆ្លាមពេលត្រូវម៉ូតូជិះបុករួចហើយ មិនបានឈប់រថយន្តចុះមើលជនរងគ្រោះទេគឺបានបន្ថែមល្បឿនចូលទៅក្នុងមជ្ឍមណ្ឌលស្ពាក យករថយន្តចតទុកធ្វើមិនដឹង ។
បន្ទាប់ពីកើតហេតុសមត្ថកិច្ចបានចុះមកពិនិត្យកន្លែងកើតហេតុនិងបានហៅម្ចាស់រថយន្តបង្កចេញមកចរចារគ្នាជាមួយជនរងគ្រោះ ជាលទ្ធផលម្ចាស់រថយន្តបានព្រមសងសំណងទៅជនរងគ្រោះចំនួន១៥០ដុល្លារដើម្បីជួសជុលម៉ូតូឡើងវិញ ហើយជនរងគ្រោះក៏យល់ព្រមទទួលសំណង ដើម្បីបញ្ចប់រឿង។ គួរបញ្ជាក់ថាចំពោះករណីចរាចរនេះគឺដោយសាររថយន្តបត់មិនបានស៊ីញ៉ូ ចំណែកម៉ូតូជិះក្នុងល្បឿនលឿនទើបបង្កឲ្យមានគ្រោះថ្នាក់បែបនេះ៕
មតិយោបល់