ភ្នំពេញ ៖ រថយន្តមួយគ្រឿងបើកបរដោយបុរសម្នាក់ក្នុងស្ថានភាពស្រវឹងធ្លាក់ភ្នែក បានបើកបុករះ ម៉ូតូ៥គ្រឿងដែលចតក្បែរចិញ្ចើមផ្លូវបណ្ដាលអោយរងការខូចខាត និងរបួសមនុស្ស៧នាក់ កាលពី វេលាម៉ោង៤និង២០នាទីទៀបភ្លឺថ្ងៃទី៥ខែមិថុនាឆ្នាំ២០១៤ ត្រង់ចំណុចក្បែរមណ្ឌលវប្បធម៌ភ្នំពេញ តាមបណ្ដោយផ្លូវម៉ៅសេទុង ស្ថិតក្នុងសង្កាត់ផ្សារដើមគ ខណ្ឌទួលគោក។
ប្រភពព័ត៌មានពីកន្លែងកើតហេតុបានអោយដឹងថា គេឃើញរថយន្តមួយគ្រឿងម៉ាកទីកូ ស៊េរីចាស់ ពាក់ស្លាកលេខ ភ្នំពេញ 2E-6953 បើកបរដោយបុរសម្នាក់ក្នុងស្ថានភាពស្រវឹងធ្លាក់ភ្នែក បានបើក ធ្វើដំណើរតាមបណ្ដោយផ្លូវម៉ៅសេទុង ទិសដៅពីត្បូងទៅជើងរេពេញផ្លូវ ខណៈមកចំណុចកើតហេតុ ក្បែរផ្សារដើមគ ក៏បានរ៉េចង្កូតបុករះម៉ូតូចំនួន៥គ្រឿងដែលចតលើចិញ្ចើមផ្លូវបណ្ដាលអោយ រងការខូចខាត និងមនុស្ស៧នាក់រងរបួសស្រាលក្នុងនោះស្ត្រី៤នាក់បុរស៣នាក់។ ម៉ូតូទាំង៥គ្រឿង មាន ម៉ូតូហុងដាឌ្រីម ធុនសេ១២៥ ពណ៌ក្រហម ពាក់ស្លាកលេខ ស្វាយរៀង 1A-5887 ម៉ូតូហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ ព្រៃវែង 1D-1965 ម៉ូតូគុបជ្រុង ពណ៌ទឹកប៊ិច ពាក់ស្លាកលេខ ភ្នំពេញ 1BD-3299 ម៉ូតូសង់កូរ៉េ ពណ៌ក្រហម ពាក់ស្លាកលេខ ភ្នំពេញ 1BC-6394 និងម៉ូតូស៊ុយស៊ូគីវីវ៉ា ពណ៌ក្រហម ពាក់ស្លាកលេខ ភ្នំពេញ 1BF-7817 ចំណែកតៃកុង រថយន្តមានឈ្មោះ យ៉ា សីហា អាយុ៣៣ឆ្នាំស្នាក់នៅម្ដុំសង្កាត់បឹងកេងកង ខណ្ឌចំការមន។
បន្ទាប់ពីកើតហេតុតៃកុងរថយន្តត្រូវបានប្រជាពលរដ្ឋឃាត់នៅកន្លែងកើតហេតុ និងបានទំនាក់ទំនង ទៅសមត្ថកិច្ចមូលដ្ឋានចុះមកអន្តរាគមន៍ និងធ្វើការវាស់វែងយកម៉ូតូនិងរថយន្តទៅរក្សាទុកនៅ អធិការដ្ឋាននគរបាលខណ្ឌទួលគោកដើម្បីធ្វើការដោះស្រាយតាមនីតិវិធីច្បាប់៕
មតិយោបល់