សាលារាជធានីភ្នំពេញ នារសៀលថ្ងៃទី ០៥ ខែ មិថុនា ឆ្នាំ ២០១៤ បានចុះហត្ថលេខាលើអនុស្សារណៈនៃការ យោគយល់ជាមួយក្រុមហ៊ុន Inter Far East Engineering Public Company Limited របស់ប្រទេសថៃ លើការ សិក្សាគំរោងកែឆ្នៃសំរាមឲ្យទៅជាឋាមពលអគ្គិសនី ។ ពិធីនេះបានប្រព្រឹត្តទៅរវាង លោក មាន ចាន់យ៉ាដា នាយករង រដ្ឋបាល សាលារារាជធានីភ្នំពេញ និង លោក Wichai Thavormwa Thanayong ប្រធានក្រុមហ៊ុន Inter Far East Engineering Public Company Limited ។
ថ្លែងក្នុងឱកាសនោះ លោក មាន ចាន់យ៉ាដា នាយករងរដ្ឋបាលសាលារារាជធានីភ្នំពេញ ឲ្យដឹងថា សំរាម ដែលត្រូវប្រមូលចេញទៅក្រៅក្រុងមានពី ១.៣០០តោន ទៅ១៥០០តោន ក្នុង១ថ្ងៃ ហើយសំរាមនេះនឹងកើនឡើងដល់ ២.០០០តោនក្នុងមួយថ្ងៃនៅឆ្នាំ ២០១៨ ក្នុងភូមិសាស្ត្រខណ្ឌទាំង១២ និងសង្កាត់ទាំង៩៦ របស់រាជធានីភ្នំពេញ ជាមួយ នឹងកំណើនប្រជាពលរដ្ឋឡើងដល់ជាង២លាននាក់ ។ លោកបានបន្តទៀតថា បើតាមបរិមាណសំរាមដែលបង្កើតឡើង ក្នុងរាជធានីភ្នំពេញនាពេលបច្ចុប្បន្ន បញ្ហាប្រឈមអាចនឹងកើតឡើង និងប៉ះពាល់ដល់បរិស្ថានទីក្រុង បើមិនមានការ យកចិត្តទុកដាក់គិតគូរទេនោះ ពិសេស បើទីលានចាក់សំរាមក្នុងខណ្ឌដង្កោបានពេញទៅហើយនោះ សាលារាជធានី ភ្នំពេញ នឹងរៀបចំគិតគូរបង្កើតឲ្យទីលានចាក់សម្រាមថ្មីមួយទៀតសម្រាប់ប្រើប្រាស់បន្ត ។
លោក Wichai Thavormwa Thanayon បានគូសបញ្ជាក់ថា ក្រោយពីការងារកែឆ្នៃកាកសំណល់សំរាមនៅទីលាន ការចុះហត្ថលេខាលើ MOU នេះ គឺជាការត្រួសត្រាយផ្លូវមួយក្នុងការរៀបចំការសិក្សាគម្រោងកែឆ្នៃសំរាមឲ្យទៅជា ឋាមពលអគ្គិសនី ។ តាមការគិតគូរ កាកសំណល់ ២០០តោន អាចបង្កើតឋាមពលអគ្គីសនីបាន ៥ ម៉េហ្គាវ៉ាត់ក្នុង១ថ្ងៃ ។ ការធ្វើបែបនេះនឹងអាចកាត់បន្ថយកាកសំណល់បានយ៉ាថច្រើននៅក្នុងរាជធានីភ្នំពេញ ។
ទន្ទឹមជាមួយនឹងគ្នានេះដែរ បើយោងតាមការចុះផ្សាយរបស់ AKP ឲ្យដឹងថា ក្រុមហ៊ុនការពារបរិស្ថានដ៏ធំមួយរបស់ប្រទេសចិន បានបង្ហាញពីបំណងចង់សហការជាមួយសាលារាជធានីភ្នំពេញ ក្នុងការបង្កើតរោងចក្រកែច្នៃសំរាមមួយឲ្យក្លាយជាថាមពលអគ្គិសនីយកមកប្រើប្រាស់វិញ ស្របពេល ដែលនៅរាជធានីភ្នំពេញសំរាមជាច្រើនតោនបានកើនឡើងក្នុងមួយថ្ងៃៗ ហើយទីតាំងចាក់សម្រាប់ចំនួន ៣ កន្លែងនៅខណ្ឌដង្កោពោរពេញទៅដោយសំរាមនោះ។
នៅក្នុងជំនួបជាមួយឯកឧត្តម អៀង អូននី អភិបាលរងរាជធានីភ្នំពេញ កាលពីថ្ងៃទី ១០ ខែមិថុនា ឆ្នាំ ២០១៤ នៅសាលារាជធានីលោក Zou GuJin ប្រធានក្រុមហ៊ុនការពារបរិស្ថានរបស់ប្រទេសចិនបានលើកឡើងថា ក្រុមហ៊ុនការពារបរិស្ថានប្រទេសចិនជាក្រុម ហ៊ុនដ៏ធំមួយ ដែលមានសាខារោងចក្រចំនួន ១៩ ដើម្បីកែច្នៃសំរាមមកប្រើប្រាស់ជាប្រ យោជន៍ផ្សេងៗដូចជា ថាមពលអគ្គិសនី គ្រឿងសំណង់ជាដើម ហើយការមកជួបជាមួយថ្នាក់ដឹកនាំសាលារាជធានីភ្នំពេញនាពេលនេះ គឺក្រុមហ៊ុនរបស់លោកមានគោលបំណងធ្វើការវិនិយោគសំរាមនៅក្នុងរាជធានី ដោយបង្កើតជារោងចក្រកែច្នៃសំរាមឲ្យទៅជាថាម ពលអគ្គីសនីយកមកប្រើប្រាស់វិញ ៕
មតិយោបល់