ខណៈពេលដែលពិភពលោកទាំងមូលកំពុងផ្ដោតអារម្មណ៍ជាមួយនឹងព្រឹត្តិការណ៍បាល់ទាត់ពិភពលោក ឆ្នាំ២០១៤ World Cup 2014 ក្នុងប្រទេសប្រេស៊ីលនោះ អាជីវករវៀតណាម បាននឹងកំពុងកាក់កបជាមួយនឹងការបង្កើតពាន World Cup 2014 សិប្បនិម្មិត្ត។
យោងតាមការចុះផ្សាយរបស់គេហទំព័រក្នុងស្រុក VNA បានឲ្យដឹងថា នៅតាមហាងលក់ទំនិញ ភោជនីយដ្ឋាន ហាងកាហ្វេ និងតាមកន្លែងមួយចំនួនទៀត ក្នុងប្រទេសវៀតណាម សុទ្ធតែបានដាក់តាំងវត្ថុជាច្រើន ដែលទាក់ទងនឹងព្រឹត្តិការណ៍បាល់ទាត់ពិភពលោក បើទោះបីជាប្រទេសមួយនេះមិនបានចូលរួមប្រកួតក៏ព្រឹត្តិការណ៍ពិភពលោកក៏ដោយ។
ដោយសារតែមានការពេញនិយម ដូច្នេះហើយទើបរវិចិត្រករមួយចំនួន បានច្នៃនូវផលិតផលដែលទាក់ទងនឹងព្រឹត្តិការណ៍នេះ រួមមាន ពានរង្វាន់ World Cup សិប្បនិម្មិត្ត បាល់ទាត់ World Cup សិប្បនិមិត្ត។ នៅក្នុងភូមិ Bat Trang ក្រុមអ្នកភូមិនៅទីនោះ បាននាំគ្នាផលិតរបស់របរជាច្រើន ដោយច្នៃជាពានរង្វាន់ World Cup សិប្បនិមិត្ត និងវត្ថុជាច្រើនទៀត។
លោក Vuong Hong Nhat អ្នកច្នៃពាន World Cup សិប្បនិមិត្ត បាននិយាយថា គាត់បានចំណាយពេលជាច្រើនម៉ោងក្នុងមួយថ្ងៃ ដើម្បីផលិតឧបករណ៍ទាំងនោះឲ្យទាន់តម្រូវការ ដោយមានហាងខ្លះលក់ដាច់បាន ៥០ពានក្នុងមួយថ្ងៃ។
លោកបានបន្តទៀតថា ភាគច្រើនអ្នកដែលមកទិញពានសិប្បនិមិត្ត ជាក្មេងដែលនិយមគាំទ្រព្រឹត្តិការណ៍បាល់ទាត់ពិភពលោក ដោយក្នុងនោះ រូបសិប្បនិមិត្ត ដែលលក់ដាច់គឺរូបរបស់កីឡាករ Cristiano Ronaldo និង Lionel Messi៕
មតិយោបល់