ភ្នំពេញ៖ បញ្ញត្តិករទូរគមនាគមន៍កម្ពុជា កំពុងតែរៀបចំឲ្យក្រុមហ៊ុនទូរស័ព្ទចល័ត qb និងក្រុមហ៊ុនទូរស័ព្ទ Smart ដោះស្រាយជម្លោះក្រៅតុលាការ ព្រមទាំងបានជូនដំណឹងដល់ក្រសួងប្រៃសណីយ៍ និងទូរគមនាគមន៍ អំពីគោលបំណងក្នុងការសម្របសម្រួលការចរចារវាងក្រុមហ៊ុនទាំងពីរនេះ។ នេះបើយោងតាមការចុះផ្សាយរបស់កាសែត ខេមបូឌា ដេលី។
ផែនការចរចាររវាងក្រុមហ៊ុន qb និង Smart ដែលត្រូវបានធ្វើឡើងដោយបញ្ញត្តិករទូរគមនាគមន៍កម្ពុជានេះ ត្រូវបានធ្វើឡើងក្រោយពេលដែលក្រុមហ៊ុន qb ប្ដឹងក្រុមហ៊ុន Smart ថាបានអូសទាញ និងបង្ខូចកេរ្តិ៍របស់ខ្លួន។
កាសែត ខេមបូឌា ដេលី បានចុះផ្សាយដោយដកស្រង់សំដីរបស់លោក អ៊ុក ដូរ៉ានី ជាសមាជិកទី២នៃបញ្ញត្តិករទូរគមនាគមន៍កម្ពុជា ថា “យើងមិនចង់ដោះស្រាយរឿងនេះនៅតុលាការទេ។ យើងចង់ព្យាយាមដោះស្រាយបញ្ហានេះជាមួយបញ្ញត្តិករ។ យើងមានផែនការធ្វើការចរចារវាងក្រុមហ៊ុន qb និងក្រុមហ៊ុន Smart”។
លោកបានបន្តទៀតថា “ក្រុមហ៊ុន Smart បានបញ្ជូនលិខិតមួយច្បាប់ទៅ បញ្ញត្តិករទូរគមនាគមន៍កម្ពុជា និងបានឲ្យដឹងថា ពួកគេចង់ចូលរួមការចរចា។ យើងជឿជាក់ថា ក្រុមហ៊ុនទាំងពីរនឹងអាចដោះស្រាយបញ្ហានេះបាន”។
លោក Alan Sinfield នាយកប្រតិបត្តិ qb បានមានប្រសាសន៍កាលពីម្សិលមិញថា ក្រុមហ៊ុនព្រមធ្វើការចរចាប្រសិនបើក្រុមហ៊ុន Smart ព្រមបង់សំណង។ លោកបានមានប្រសាសន៍ថា “ប្រសិនបើ បញ្ញត្តិករទទួលយកការផ្តួចផ្តើមនេះ ហើយប្រសិនបើ ក្រុមហ៊ុន Smart ព្រមសងដល់ការខូចខាតផលប្រយោជន៍ហិរញ្ញវត្ថុ ដូច្នេះយើងនឹងព្រមពិភាក្សាបញ្ហានេះ ប៉ុន្តែ បើមិនព្រមទេនោះ យើងនឹងស្វែងរកសំណងតាមរយ:តុលាការ”។ លោកបានបន្ថែមថា ” ពេលវេលាគឺសំខាន់ណាស់ ពីព្រោះយើងនឹងបន្តបណ្តឹងរដ្ឋប្បវេណីតាមរយ:តុលាការ”។
គួរបញ្ជាក់ផងដែរថា ក្រុមហ៊ុន qb ជាក្រុមហ៊ុនមួយក្នុងចំណោមក្រុមហ៊ុនទូរស័ព្ទចល័តតូចបំផុតនៅកម្ពុជាបានចោទប្រកាន់ក្រុមហ៊ុន Smart ដែលជាក្រុមហ៊ុនធំបំផុតទី២ គិតតាមចំនួនអតិថិជននៅកម្ពុជា ថាបានបង្ខូចកិត្តិនាម និងធ្វើឲ្យខូចផលប្រយោជន៍ហិរញ្ញវត្ថុរបស់ខ្លួន បន្ទាប់ពីក្រុមហ៊ុនទាំងពីរនេះបានបញ្ចប់កិច្ចព្រមព្រៀងមានយូរមកហើយ ដែលអនុញ្ញាតឲ្យអតិថិជន qb “ ប្រើសេវា Roaming ” តាមប្រព័ន្ធទូរស័ព្ទរបស់ក្រុមហ៊ុន Smart៕
ចុចអានអត្ថបទ៖ qb ប្ដឹង Smart ពីបទបង្ខូចកេរ្តិ៍ និងអូសទាញអតិថិជន
មតិយោបល់