ភ្នំពេញ ៖ នារី២នាក់ជិះម៉ូតូចេញពីធ្វើការរួចជិះត្រឡប់ទៅផ្ទះត្រូវជនសង្ស័យ២នាក់ធ្វើសកម្មភាពឆក់កាបូបបានសម្រេច ហេតុការណ៍នេះបានកើតឡើងកាលពីវេលាម៉ោង ០៩និង៣០នាទីយប់ ថ្ងៃ ទី ០១ខែកក្កដាឆ្នាំ២០១៤ ស្ថិតនៅជិតខារ៉ាអូខេសង់អេលិចសេ តាមបណ្ដោយផ្លូវ៦៣ ស្ថិតក្នុងសង្កាត់បឹងកេងកងទី១ ខណ្ឌចំការមន។
នារីរងគ្រោះឈ្មោះ ជូ សេរីលក្ខ័ណា អាយុ២៣ឆ្នាំ មានមុខរបរធ្វើការនៅក្រុមហ៊ុនមួយកន្លែង ស្នាក់នៅក្នុងសង្កាត់អូឬស្សីទី២ ខណ្ឌ៧មករា ។
ចំណែកនារីម្នាក់ទៀតជាជនជាតិចិន តែសមត្ថកិច្ចនៅមិនទាន់ស្គាល់អត្តសញ្ញានៅឡើយ។
យោងទៅតាមសម្ដីជនរងគ្រោះបានអោយដឹងថា មុនពេលកើតហេតុរូបនាង បានជិះម៉ូតូ អាយខុន មួយគ្រឿង ពណ៌ទឹកក្រូចលាយស ពាក់ស្លាកលេខ ភ្នំពេញ 1AX-0656 ទើបតែចេញពីធ្វើការនៅម្ដុំវិមានឯករាជ ក្នុងទិសដៅពីជើងទៅត្បូង ខណៈមកដល់ចំណុចកើតហេតុខាងលើ ក៏មានជនសង្ស័យ២នាក់ ជិះម៉ូតូហុងដាឌ្រីមសេ១២៥ មួយគ្រឿង ពណ៌ខ្មៅ អត់ពាក់ស្លាកលេខ ជិះពីក្រោយរូបនាង រួចធ្វើសកម្មភាពឆក់កាបូបបានសម្រេច រួចជនសង្ស័យជិះម៉ូតូរត់គេចបានដោយសុវត្តិភាព ។ ចំណែកកាបូបលុយ ដែលត្រូវជនសង្ស័យ ឆក់យកទៅនោះមាន អត្តសញ្ញាប័ណ្ណ និងកាត ATM ហើយ ទឹកប្រាក់ចំនួន ៣០០ ដុល្លារ។
ក្រោយពេលកើតហេតុជនរងគ្រោះខាងលើបានទៅ ដាក់ពាក្យប្តឹងនៅ ប៉ុស្តិ៍នគរបាលបឹងកេងកងទី១ ដើម្បីស្រាវជ្រាវរកមុខសញ្ញាជនសង្ស័យខាងលើ៕
មតិយោបល់