រាជធានីភ្នំពេញ ៖ ម៉ូតូស្ដេបមួយគ្រឿងជិះដោយយុវជន៣នាក់ធ្វើដំណើរក្នុងល្បឿនលឿនបានបុកចំម៉ូតូសង់កូរ៉េមួយចតស្ងៀមចាំម៉ូយចំពេញទំហឹងបណ្ដាលអោយរងរបួសធ្ងន់៣នាក់និងស្រាលម្នាក់។
ហេតុការណ៍នេះបានកើតឡើងកាលពីវេលាម៉ោង១២និង២០នាទីរំលងអាធ្រាត្រ ឈានចូលថ្ងៃទី ២ ខែកក្កដាឆ្នាំ២០១៤ ត្រង់ចំណុចក្បែរស្ថានីយ៍ប្រេងឥន្ទនៈសូគីមិច តាមបណ្ដោយផ្លូវវេងស្រេង ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញយុវជន៣នាក់ជិះម៉ូតូមួយគ្រឿងម៉ាកស៊ុយស៊ូគីស្ដេប ពណ៌ក្រហមលាយខ្មៅ ពាក់ស្លាកលេខ ភ្នំពេញ 1AB-1607 ធ្វើដំណើរតាមបណ្ដោយផ្លូវវែងស្រេង ទិសដៅពីកើតមកលិចក្នុងល្បឿនលឿន ស្រាប់តែមកដល់ចំណុចកើតហេតុស្ថានភាពផ្លូវពិបាកព្រោះកំពុងតែស្ថាបនានិងងងឹត ក៏មានម៉ូតូសង់កូរ៉េមួយគ្រឿង ពណ៌ក្រហម ពាក់ស្លាកលេខ ខ3582 កណ១ ជិះដោយបុរសម្នាក់ជាអ្នករត់ម៉ូតូឌុបបានឈប់ចតលើផ្លូវចាំម៉ូតដោយគ្មានអ្វីសំគាល់ ធ្វើអោយម៉ូតូស្ដេបមើលមិនឃើញក៏បុកចំពេញទំហឹងបណ្ដាលបុរសអ្នករត់ម៉ូតូឌុបនិងយុវជន២នាក់រងរបួសធ្ងន់ចំណែកយុវជនម្នាក់ទៀតរងរបួសស្រាលបានគេចខ្លួនពីកន្លែងកើតហេតុបាត់ ហើយម៉ូតូទាំង២គ្រឿងរងការខូចខាតទាំងសងខាង។
បន្ទាប់ពីកើតហេតុជនរងគ្រោះទាំង៣នាក់ត្រូវគេបញ្ជូនទៅសង្គ្រោះនៅមន្ទីរពេទ្យភ្លាមៗ ៕
មតិយោបល់