ព្រឹកថ្ងៃទី ០៣ ខែ កក្កដា ឆ្នាំ ២០១៤ សាលារាជធានីភ្នំពេញ បានរៀបចំពិធីប្រកាសតែងតាំង លោក ងី ប៊ុនលី ជាប្រធានមន្ទីររ៉ែ និងឋាមពលរាជធានីភ្នំពេញ ។ ពិធីនេះបានប្រព្រឹត្តទៅក្រោមអធិបតីភាព លោកជំទាវ ប៉ែន ឆដា រដ្ឋលេខាធិការក្រសួងរ៉ែ និងឋាមពល និង ឯកឧត្តម សេង រតនៈ អភិបាលរងរាជធានីភ្នំពេញ ។
ថ្លែងទៅកាន់អង្គពិធី ឯកឧត្តម សេង រតនៈ អភិបាលរងរាជធានីភ្នំពេញ បានគូសបញ្ជាក់ថា ទន្ទឹមនឹងការ រីកចម្រើនរបស់រាជធានីភ្នំពេញ យើងនៅមានបញ្ហាប្រឈមមួយចំនួន ដូចជា ការប្រកបអាជីវកម្មបញ្ចូលហ្គាសនៅ តាមផ្ទះដែលងាយនឹងបង្ករគ្រោះថ្នាក់ ការគ្រប់គ្រងរណ្តៅដីមិនទាន់បានល្អនៅឡើយដោយខ្វះបទដ្ឋានបច្ចេកទេស គ្មានលិខិតអនុញ្ញាតពីអាជ្ញាធរជាដើម ។ ការធ្វើអាជីវកម្មបូមខ្សាច់តាមដងទន្លេនៅតែកើតមានក្នុងតំបន់ហាមឃាត់ ដែលបង្ករគ្រោះថ្នាក់ និងការភ័យខ្លាចដល់ប្រជាពលរដ្ឋ ។ ដូច្នេះ មន្ទីរជំនាញ ត្រូវជំរុញឲ្យម្ចាស់អាជីវកម្មទាំងអស់ អនុវត្តតាមបទដ្ឋានបច្ចេកទេស និងសុំច្បាប់ឲ្យបានត្រឹមត្រូវ ។
មានប្រសាសន៍ក្នុងនោះដែរ លោកជំទាវ ប៉ែន ឆដា រដ្ឋលេខាធិការក្រសួងរ៉ែ និងឋាមពល បានសង្កត់ធ្ងន់ថា នៅរាជធានីភ្នំពេញ មានបញ្ហាប្រឈមជាច្រើនទាក់ទងទៅនឹងវិស័យរ៉ែ និងឋាមពល ដូចជា សុវត្ថិភាពហ្គាស ការធ្វើ អាជីវកម្មរណ្តៅដី ការបូមខ្សាច់ខុសច្បាប់ជាដើម ដែលចាំបាច់ មន្ទីររ៉ែ និងឋាមពលរាជធានីភ្នំពេញ ត្រូវក្តាប់ឲ្យបាន និង ជំរុញឲ្យម្ចាស់អាជីវកម្មទាំងនោះបំពេញបែបបទត្រឹមត្រូវតាមច្បាប់ និងក្តាប់ឲ្យបានពីគោលនយោបាយរបស់រាជរដ្ឋា ភិបាល និងផែនការអភិវឌ្ឍន៍លើវិស័យនេះ។
មតិយោបល់