ភ្នំពេញ ៖ ស្ត្រីម្នាក់បើករថយន្តជូនកូនទៅញ៉ាំអី មកដល់ផ្លូវកែងត្រូវរថយន្តមួយគ្រឿងទៀតបើកក្នុងល្បឿនលឿនមិនប្រយ័ត្នក៏ជ្រុលបុកប៉ះគ្នាខ្ទេចផ្នែកខាងមុខរថយន្តទាំងសងខាង។ ហេតុការណ៍នេះ បានកើតឡើងកាលពីវេលាម៉ោង១១និង១០នាទីយប់ថ្ងៃទី៨ខែកក្កដាឆ្នាំ២០១៤ ត្រង់ចំណុចមុខ ភោជនីយដ្ឋានសេវេនប្រាយ តាមបណ្ដោយផ្លូវលេខ៧០ ស្ថិតក្នុងសង្កាត់ស្រះចក ខណ្ឌដូនពេញ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្ត មួយគ្រឿងម៉ាកតូយ៉ូតាកាមរី ពណ៌ប្រផេះក្រមៅ ពាក់ស្លាកលេខ ភ្នំពេញ 2M-8144 ធ្វើដំណើរតាមបណ្ដោយផ្លូវបេតុងច្រកផ្ទះល្វែងបត់ឆ្វេងឡើងផ្លូវលេខ៧០ ខណៈដែលរថយន្តទើបតែឆ្លងផ្លូវបានប្រហែល២ម៉ែត្រ ស្រាប់តែមានរថយន្តមួយគ្រឿងម៉ាកលុចស៊ីស៥៧០ ពណ៌ខ្មៅ ពាក់ស្លាកលេខ ភ្នំពេញ 2P-9696 ជិះដោយបុរស២នាក់ធ្វើដំណើរតាមបណ្ដោយផ្លូវលេខ៧០ ទិសដៅពីកើតទៅលិច ក៏បានបុកប៉ះនិងរថយន្តកាមរី ធ្វើអោយរងការខូចខាតផ្នែកខាងមុខទាំងសងខាង។
បើតាមសម្ដីស្ត្រីដែលបើកបរថយន្តកាមរីឆ្លាម បានអោយដឹងថាគាត់បានបើករថយន្តចេញពីផ្ទះជូនកូនរបស់គាត់ទៅញ៉ាំអីនៅម្ដុំពេទ្យកាល់ម៉ែត្រ ស្រាប់តែរៀបបត់ឆ្លងផ្លូវក៏មានរថយន្តមួយគ្រឿងមកបុកប៉ះគាត់តែម្ដង។ ហើយចំណែកភាគីខាងរថយន្តលុចស៊ី៥៧០បានអោយដឹងថា គាត់ទើបតែចេញពីកម្មវិធីជប់លៀងផ្ទះមិត្តភ័ក្តិហើយធ្វើដំណើរទៅផ្ទះក៏មានរថយន្តមួយគ្រឿងបើកឆ្លងផ្លូវបុកប៉ះរថយន្តរបស់គាត់តែម្ដង។ បន្ទាប់ពីកើតហេតុភាគីទាំងសងខាងបានធ្វើការសម្របសម្រួលដោយភាគីខាងរថយន្តលុចស៊ីសទារសំណងចំនួន៥០០ដុល្លារ ប៉ុន្តែភាគីខាងរថយន្តឆ្លាមមានត្រឹមតែ៥០ដុល្លារ ទើបដោះស្រាយគ្នា មិនត្រូវ។
ក្រោយពេលកើតហេតុដោយភាគីទាំងសងខាងមិនអាចសម្របសម្រួលគ្នាបាន ទើបសមត្ថកិច្ចសម្រេចធ្វើការវាស់វែងយករថយន្តទាំង២គ្រឿងទៅរក្សាទុកនៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញដើម្បីធ្វើការដោះស្រាយតាមនីតិវិធីច្បាប់៕
មតិយោបល់