ភ្នំពេញ៖ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានឲ្យដឹងនៅរសៀលថ្ងៃនេះថា បានប្រាប់ សារព័ត៌មានក្នុងស្រុមមួយឲ្យដឹងថា សាលារាជធានីភ្នំពេញ នឹងបិទមហាវិថីមួយចំនួននៅព្រឹកថ្ងៃស្អែក ដើម្បីប្រារព្ធព្រះរាជពិធីដង្ហែព្រះបរមអដិ្ឋ ព្រះករុណាព្រះបរមរតនកោដ្ឋ។
ផ្លូវដែលត្រូវបិទនោះរួមមាន វិថីព្រះធម្មលិខិតអ៊ុក (ផ្លូវលេខ១៨៤) ខាងជើងព្រះបរមរាជវាំង មហាវិថីនរោត្តម មហាវិថីព្រះសីហនុ និងមហាវិថីសម្តេចសុធារស ដោយព្រះរាជពិធីដង្ហែ ព្រះបរមអដ្ឋិ ព្រះករុណាព្រះបរមរតនកោដ្ឋ នឹងត្រូវប្រារព្ធនៅថ្ងៃទី១១ ខែកក្កដា ឆ្នាំ២០១៤ វេលាម៉ោង៦:៣០នាទីព្រឹក ស្អែកនេះ។
ព្រះរាជពិធីដង្ហែព្រះបរមអដ្ឋិព្រះមហាវីរក្សត្រ ត្រូវបានរៀបចំឡើងជា ៤ផែន ធំៗ ចម្ងាយផ្លូវជាង ១០គីឡូម៉ែត្រ ហែចេញពីទ្វារជ័យព្រះបរមរាជវាំង ឆ្ពោះទៅកាន់ទិសខាងជើង តាមមហាវិថីសម្តេចសុធារស រួចបត់ឆ្វេងតាមវិថីព្រះធម្មលិខិត អ៊ុក បត់ឆ្វេងតាមមហាវិថីព្រះនរោត្តម ព័ទ្ធខាងលិចវិមានឯករាជ្យ បត់ឆ្វេងតាមមហាវិថីព្រះសីហនុ រួចបទឆ្វេងតាមមហាវិថីព្រះសុធារស ឆ្ពោះចូលទៅកាន់ទ្វារធំខាងកើតព្រះឧបោសថរតនារាមព្រះកែវមរកតនៃព្រះបរមរាជវាំងវិញ ដើម្បីតម្កល់ព្រះបរមអដ្ឋិនៅក្នុងព្រះវិហារព្រះកែវមរកត។
គួរបញ្ជាក់ផងដែរថា ព្រះករុណាព្រះបាទសម្តេច ព្រះនរោត្តម សីហនុ ព្រះមហាវីរក្សត្រ «ព្រះបរមរតនកោដ្ឋ» បានយាងចូលទិវង្គតនៅមន្ទីរពេទ្យ ទីក្រុងប៉េកាំង សាធារណរដ្ឋប្រជាមានិតចិន ដោយជរាពាធ ក្នុងព្រះជន្មាយុ៩០ព្រះវស្សា កាលពីថ្ងៃ ទី១៥ ខែតុលា ឆ្នាំ២០១២៕
មតិយោបល់