ចាំបានថា កាលពីអំឡុងឆ្នាំ១៩៩៤ ឬ១៩៩៥ តែងមានផ្អើលថា មានប្រម៉ាត់ប្រម៉ង់ ដើរចាប់មនុស្ស ជាដើម តែមិនដឹងវាជាករណីពិតប្រាកដ ឬយ៉ាងណានោះទេ។ សូម្បីតែរហូតមកទល់ពេលនេះ ភាពល្បីល្បាញនៃពាក្យ ប្រម៉ាត់ប្រម៉ង់ គឺមានត្រឹមតែឈ្មោះ ហើយមិនដឹងថា ជាករណីពិត ឬយ៉ាងណានោះឡើយ។ តាមពិតរឿងនេះ មិនមែនកើតមានតែក្នុងសម័យក្រោយៗនេះឡើយ គឺវាកើតមានតាំងពីក្នុងសម័យអង្គរមកម្ល៉េះ។
យោងតាមកំណត់ហេតុរបស់ ជីវតាក្វាន់ ដែលជាប្រតិភូប្រទេសចិន បានមកទស្សនកិច្ចប្រទេសកម្ពុជា នៅចុងសតវត្សទី១២ បានកត់ត្រាពីប្រវត្តិរឿងរ៉ាវ ដែលទាក់ទងទៅនឹង ប្រមាត់ប្រមង់ ដោយបង្ហាញថា ប្រមាត់ប្រមង់ មានពិតមែន កាលពីអតីតកាល។
កាលពីមុន ឱ្យតែដល់ខែទី៨ គេតែងធ្វើការចាប់មនុស្សយកប្រមាត់ ព្រោះស្តេចក្រុងចម្បា ក្នុងមួយឆ្នាំ គេសុំយកប្រមាត់មនុស្សមួយថូ ដែលមានចំនួនរាប់ពាន់។ នៅក្នុងពេលយប់ គេចាត់ពួកអ្នកយកប្រមាត់ (ប្រមាត់ប្រមង់?) ដើរទៅតាមផ្លូវនានា នៅតាមទីក្រុង និងក្នុងភូមិ។ បើប្រទះមនុស្សណាដើរក្នុងពេលយប់ស្ងាត់នោះ គេចាប់យកខ្សែរចងក្បាលអោយជាប់ ហើយយកកូនកាំបិតចាក់ក្រោមខ្លៀកខាងស្តាំ ខ្វះយកប្រមាត់ដាក់ក្នុងថូ លុះត្រាតែបានពេញចំនួន ទើបគេយកទៅថ្វាយស្តេចក្រុងចម្បា។ ប៉ុន្តែគេមិនយកប្រមាត់នៃជនជាតិចិនទេ។
ពីព្រោះមានកាលមួយឆ្នាំនោះ គេយកប្រមាត់របស់ចិនមួយទៅលាយនឹងគេ ក៏បណ្តាលអោយស្អុយរលួយខូចប្រមាត់នៅក្នុងថូ លែងប្រើការបានទាំងអស់ លុះពេលក្រោយមក គេលែងមានការដើរចាប់យកប្រមាត់ទៀតហើយ ហើយគេចាត់មន្ត្រីដោយឡែក សំរាប់មុខងារខាងយកប្រមាត់ពីពួកក្រោមអំណាចខ្លួន ដែលតាំងអោយនៅជាយក្រុងក្បែរទ្វារខាងជើង៕
https://i1272.photobucket.com/albums/y389/domneng/img_0651_zps9d746bf2.jpg
ប្រភព៖កំណត់ហេតុជីវតាក្វាន់
មតិយោបល់