ភ្នំពេញ៖ ខណៈដែលការប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៤ ខិតឈានមកដល់នោះ លោក ហង់ ជួន ណារ៉ុន រដ្ឋមន្ត្រីក្រសួងអប់រំបានមានប្រសាសន៍នៅថ្ងៃព្រហស្បតិ៍ម្សិលមិញថា លោកមានជំនឿទៅលើការប្រឡងឆ្នាំនេះ នឹងលុបបំបាត់ការលួចចម្លង (បើកចាក់) និងទទួលបានអ្នកមានសមត្ថភាពពិតប្រាកដ។
ថ្លែងនៅក្នុងកិច្ចប្រជុំនៅវិទ្យាស្ថានជាតិអប់រំក្នុងរាជធានីភ្នំពេញ លោករដ្ឋមន្ត្រីរូបនេះក៏បានព្រមានដល់សិស្ស គ្រូ និងអនុរក្សថា អង្គភាពប្រឆាំងអំពើពុករលួយដ៏មានអំណាច នឹងឃ្លាំមើលការប្រឡងនៅតាមមណ្ឌលប្រឡងចំនួន១៥៤មណ្ឌលទូទាំងប្រទេសដោយមានសិទ្ធិដាក់ទោសតាមច្បាប់ចំពោះការលួចចម្លង។
លោក ណារ៉ុន បានមានប្រសាសន៍ថា “ប្រសិនបើការប្រឡងនៅឆ្នាំនេះមិនតឹងរឹងទេនោះ នឹងមានការបាត់បង់ទំនុកចិត្តនៅឆ្នាំក្រោយ។ អ្វីដែលយើងកំពុងធ្វើគឺមិនត្រឹមតែដាក់ទណ្ឌកម្មទេ ប៉ុន្តែ យើងត្រូវការគុណភាពអប់រំ”។
គួរបញ្ជាក់ផងដែរថា ការប្រឡងបាក់ឌុបឆ្នាំនេះ នឹងត្រូវធ្វើឡើងនៅថ្ងៃចន្ទសប្ដាហ៍ក្រោយ៕
មតិយោបល់