ខេត្តកំពង់ធំ៖បទល្មើសនេសាទរាប់ពាន់ម៉ែត្រ ដែលឈ្មួញដុះស្លែរបានឃុបឃិតគ្នាជាមួយសមត្ថកិច្ចជំនាញ និងអាជ្ញាធរមូលដ្ឋាន បើកភ្លើងខៀវឲ្យមានការដាក់ឧបករណ៍ នេសាទសាទដោយខុសច្បាប់ ត្រូវបានលោក វរ:សេនីយ៍ត្រី ឃុន ប៊ុនហូ មេបញ្ជាការកងរាជអាវុធហត្ថស្រុកស្ទោងដឹកនាំកម្លាំងមន្ត្រីក្រោមឳវាទជាង១០នាក់ សហការជាមួយលោក ឆូយ កុលស អភិបាលរងស្រុកស្ទោង និងកម្លាំងតំបន់ប្រតិបត្តិការសឹករងកំពង់ធំ ចុះបង្ក្រាបបទល្មើសនេសាទ ក្នុងរដូវត្រីពងកូនស្ថិតនៅក្នុងឃុំ សព្រោជ និងឃុំពាមបាង ស្រុកស្ទោង ខេត្តកំពង់ធំកាលពីថ្ងៃទី ១ ខែ សីហា ឆ្នាំ ២០១៤។
តាមការរៀបរាប់របស់ កម្មករស៊ីឈ្នួកយាម របាំងសាច់អួន បានឲ្យដឹងថា ថៅកែរបស់ខ្លួនឈ្មោះ ឆេង សួរ រស់នៅកំពង់ក្តី ស្រុកជីក្រែង ខេត្តសៀមរាប បានបង់លុយឲ្យលោក ថាត នាយរងខណ្ទរដ្ឋបាលជលផល កំពង់ធំ និងលោក ហួន ផល នាយសង្កាត់រដ្ឋបាលជលផលពាមបាង លោក គន ចាន់សីហា នាយសង្កាត់ រដ្ឋបាលជលផលស្ទោង ហើយបានដាក់ដៃចំនួន ៥កន្លែង ក្នុងមួយកន្លែងមានប្រវែងជាង២០០០ម៉ែត្រ ។
សកម្មភាពប្រព្រឹត្តបទល្មើសទាំងនេះ មិនអាចលាក់ជិតនិងក្រសែភ្នែករបស់សមត្ថកិច្ចជំនាញបានទេ តែត្រូវ បានគេដឹងថា បើកខ្មោចស្រុកមិនឲ្យដៃ ខ្មោចព្រៃក៏មិនហ៊ាន បើជលផលមិនបើកភ្លើងខៀវ ឈ្មួញក៏មិនហ៊ាន ចូលមកសែនព្រេនដែរ សកម្មភាពរបស់ ឧក្រិដ្ឋជន ឆេង សួរ រស់នៅស្រុកជីក្រែង បានម៉ៅផ្តាច់ទិញទឹកចិត្ត របស់សមត្ថកិច្ចជលផលកំពង់ធំ ឲ្យរងនូវភាពពិការមិនអាចចុះបង្ក្រាបបទល្មើសបានទេ ដោយសារតែសំណែន បង្ករឲ្យភ្លេចអស់នូវឆន្ទះជាអ្នកអភិរក្សបទល្មើសនេសាទ។
សកម្មភាពបង្ក្រាបរបស់ កម្លាំងកងរាជអាវុធហត្ថស្រុកស្ទោង បានបន្តធ្វើសកម្មភាពបង្ក្រាបបទល្មើសនេសាទជាបន្តបន្ទាប់ដូចភ្លៀងរលឹម ទោះជាមានភ្លៀងផ្គររន្ទះក៏ឆន្ទះបង្ក្រាបបទល្មើសទទួលបានលទ្ធផលជា ច្រើនកន្លែង ក្រោមការចង្អុលបង្ហាញពីសំណាក់ ឯកឧត្តម អ៊ុត សំអន អភិបាលនៃគណ:អភិបាលខេត្តកំពង់ធំ និងជាប្រធានគណ:បញ្ជាការឯកភាពខេត្ត បានជម្រុញនិងគាំទ្រ ឲ្យម្ចាស់មូលដ្ឋាន ទទួលខុសត្រូវចំពោះ បញ្ហារបទល្មើស។
លោក វរ:សេនីយ៍ត្រី ឃុន ប៊ុនហូ មេបញ្ជាការកងរាជអាវុធហត្ថស្រុកស្ទោង បានឲ្យដឹងថា ក្រោយពីទទួលសេចក្តីរាយការណ៍ ពីបងប្អូនប្រជាពលរដ្ឋ ដែលរស់នៅក្នុងបឹងទន្លេសាប ថាមានបទល្មើសរាប់ពាន់ម៉ែត្រ សុំ ឲ្យមានការចុះបង្ក្រាបទប់ស្កាត់ជាបន្ទាន់ តែបើសិនជាពុំមានសកម្មភាពបង្ក្រាបបទល្មើសនេសាទទេ ប្រជាពលរដ្ឋ និងចាត់ការដោយខ្លួនឯង ទើបលោក ឃុន ប៊ុនហូ បានសុំយោបល់ពី លោក ឧត្តមសេនីយ៍ត្រី ហង្ស ថុល មេបញ្ជាការកងរាជអាវុធហត្ថខេត្តកំពង់ធំ និងមានការឯកភាពពីលោក អ៊ិត សុធា ព្រះរាជអាជ្ញាអមសាលាដំបូង ខេត្តកំពង់ធំ ឲ្យដឹកនាំមន្ត្រីក្រោមឳវាទ ចុះបង្ក្រាបនៅទីតាំង ឃុំសព្រោជ និងឃុំ ពាមបាង ៕
មតិយោបល់