យោងតាមសារព័ត៌មានស៊ីនហួរបានចុះផ្សាយឲ្យដឹងថាយន្តហោះប៊ូអ៊ីញ ៧៤៧ មួយគ្រឿង បានមកដល់កាលពីថ្ងៃចន្ទ នៅទីក្រុង Conakry ដែលជារដ្ឋធានីរបស់ប្រទេសហ្គីណេ ជាមួយនឹងគ្រឿងសម្ភារពេទ្យ ៨០តោន ដែលជាអំណោយរបស់ប្រទេសចិន សម្រាប់ប្រទេសចំនួន៣ ដែលត្រូវបានរងផលប៉ះពាល់ ដោយជំងឺនៃមេរោគអេបូឡា ដូចជា ប្រទេសហ្គីណេ, ប្រទេស Liberia និង ប្រទេស Sierra Leone។
នៅអាកាសយានដ្ឋាន Conakry ឯកអគ្គរដ្ឋទូតចិន លោក Bian Jianquiang បានប្រគល់ គ្រឿងសម្ភារពេទ្យ ថ្នាំពេទ្យ និងថ្នាំសម្លាប់មេរោគ ២៤តោន ដែលមានតម្លៃ ១០លានយ័ន (ជិត ១,៦លាន ដុល្លារអាម៉េរិក) ដល់រដ្ឋមន្ត្រីកិច្ចសហប្រតិបត្តិការអន្តរជាតិហ្គីណេ លោក Koutoubou Sanoh។
ដោយបានសម្តែងការអរគុណពីរដ្ឋាភិបាលហ្គីណេ លោក Sanoh បានអះអាងបញ្ជាក់ថា៖ «ជំនួយសុខាភិបាលនេះ គឺជាភ័ស្តុតាងពិតប្រាកដ នៃការយកចិត្តទុកដាក់ជាពិសេស ដែលរដ្ឋាភិបាលចិនគិតដល់សុខុមាលភាពរបស់ប្រជាជនហ្គីណេ»។
រដ្ឋមន្ត្រីហ្គីណេ បានគូសបញ្ជាក់ថា៖ « ប្រទេសចិន គឺជាប្រទេសទីមួយដែលបានផ្តល់អំណោយដ៏សំខាន់មួយដល់កាកបាទក្រហមហ្គីណេ និង ប្រទេសចិន ក៏ជាប្រទេសទីមួយផងដែរ ដែលបានបញ្ជូនយន្តហោះមួយគ្រឿង សម្រាប់ដឹកគ្រឿងសម្ភារពេទ្យ ជាគុណប្រយោជន៍ដល់ប្រជាជន»។
លោក Sanonh បានគូសបញ្ជាក់ថា៖ «ក្នុងគ្រាលំបាក ដែលគេស្គាល់មិត្ត» ដោយលោកបានគូសបញ្ជាក់ទៀតថា ប្រទេសចិននឹងបង្ហាញពីមិត្តភាពដ៏ស្មោះត្រង់របស់ខ្លួន បន្ថែមទៀត និងឥត ឈប់ឈរ ចំពោះប្រជាជនហ្គីណេ ដែលកំពុងប្រឈមមុខទៅនឹងស្ថានភាពដ៏លំបាកមួយ ជាមួយមេរោគអេបូឡា។
ចំណែកឯកអគ្គរដ្ឋទូតចិនក្នុងប្រទេសហ្គីណេ បានពន្យល់បញ្ជាក់ថា តាមការអំពាវនាវ របស់ប្រមុខរដ្ឋនៃប្រទេសហ្គីណេ ប្រទេស Libéria ប្រទេស Sierra Leone និងរបស់អង្គការសុខភាព ពិភពលោក (OMS) មកនោះ រដ្ឋាភិបាលចិន បានសម្រេចចិត្តផ្តល់អំណោយថ្មីមួយ ជាគ្រឿង សម្ភារពេទ្យ ២៤តោន ដល់រដ្ឋាភិបាលហ្គីណេ។
ម្យ៉ាងទៀត លោកឯកអគ្គរដ្ឋទូត បានបន្តទៀតថា ក្រុមការងារវេជ្ជសាស្ត្រមួយក្រុម ដែលរួម មានអ្នកជំនាញការបីរូប បានរង់ចាំនៅក្នុងប្រទេស ហ្គីណេ ជាកន្លែងដែលពួកគេនឹងចូលរួមក្នុងកិច្ចខិតខំប្រឹងប្រែងរបស់ប្រទេសហ្គីណេ ក្នុងការទប់ទល់នឹងជំងឺអេបូឡា។
អ្នកការទូតចិនបាននិយាយថា៖ «ប្រទេសចិន និងប្រទេសហ្គីណេ តែងតែចែករំលែកជោគវាសនាដូចគ្នានិងសាមគ្គីគ្នាដើម្បីអ្នកល្អក៏ដូចអ្នកអាក្រក់»។
បន្ទាប់ពីប្រទេសហ្គីណេ យន្តហោះ បានហោះទៅកាន់ប្រទេស Sierra Léone និងប្រទេស Libéria។
មតិយោបល់