អង់គ្លេស ៖ បិសាចក្រហម បានអះអាងថា បានចុះហត្ថលេខាជាមួយនឹង កីឡាករសញ្ជាតិអាហ្សង់ទីនិងជាខ្សែការពារ Marcos Rojo ក្លិប Sporting Lisbon ។
បើយោងតាមសារព័ត៌មាន The Guardian បានចុះផ្សាយថា កីឡាករវ័យ ២៤ ឆ្នាំនេះបានដាក់ប៊ិចចុះហត្ថលេខា ជាមួយនឹងបិសាចក្រហម ៥ ឆ្នាំ ក្នុងតម្លៃ ១៦ លានផោន ប្រហែល ២៦ លានដុល្លារ លេងឲ្យក្លិបជើងខ្លាំងមួយនេះ ដែលកំពុងធ្លាក់ដុនដាប ។
កីឡាករ Rojo គឺជាគន្លឹះមួយដ៏សំខាន់ សម្រាប់ អាហ្សង់ទីន ក្នុងអំឡុងពេលប្រកួត World Cup ដែលជួយក្រុម ឡើងទៅកាន់វគ្គ ផ្តាច់ព្រ័ត្រ ដោយចាញ់អាល្លឺម៉ង់ ។
កីឡាករសញ្ជាតិអាហ្សង់ទីន បានប្រាប់ដល់ គេហទំព័រក្លិបថា ” វាជារឿងកិត្តិយសដ៏ធំហើយ ដែលខ្លួន មានឱកាសក្លាយជាអ្នកលេងនៅទីនេះ ដែលជាក្លិបដ៏អស្ចារ្យនៅលើពិភពលោក” ។ ម្យ៉ាងវិញទៀត ខ្ញុំនឹងធ្វើការលំបាក ជាមួយនឹងមិត្តរួមក្រុមថ្មី ដើម្បីលើកពាន ហើយក៏ដឹងពី មហិច្ចតា អ្នកដឹកនាំផងដែរ ។
អ្នកចាត់ការទូទៅ ក្លិបបិសាចក្រហម លោក Louis van Gaal បានបន្ថែមថា ” Marcos Rojo គឺជាខ្សែការពារដ៏មាន ទេពកោសល្យខ្លាំងណាស់ គាត់លេង នៅក្នុងកម្រិតមួយដ៏ខ្ពស់ បំផុត នៅក្នុងការប្រកួតបាល់ទាត់ ពិភពលោកនិង អាចលេងជាខ្សែការពារកណ្តាល ឬឆ្វេង ” ។
បញ្ជាក់ផងដែរថា កីឡាករ Marcos Rojo ជាអ្នកទី ៣ ហើយដែលចុះកុងត្រា ជាមួយនឹង បិសាចក្រហម ក្នុងនោះមាន ខ្សែការពារឆ្វេង Luke Shaw និងខ្សែបម្រើ Ander Herrera ៕
មតិយោបល់