តាកែវ ៖ បទល្មើសជលផលកើតមាន ឬ មិនមានវាអាស្រ័យទៅលើមន្ត្រីជំនាញជលផល ។ តែបើមន្ត្រីជំនាញទាំងអនុវត្តច្បាប់ជលផល ប្រាកដជាបទល្មើសជលផលក៏មិនអាចកើតមានបែបអាណាធិបតេយ្យស្អីដែរ ។ លុះត្រាតែមន្ត្រីជំនាញទាំងនោះនៅពីក្រោយខ្នងបទល្មើស ។
យ៉ាងណាម៉ិញនៅលើផ្ទៃបឹងតំបន់អតីតឡូត៏លេខ១០.១១.១២.១៣ ក្នុងស្រុកអង្គរបុរី ខេត្តតាកែវ ពោរពេញទៅទូកបទល្មើសនេសាទឆ្លងដែនរាប់រយទូក ។ ចំណែកមន្ត្រីជំនាញជលផលចាប់ពីសង្កាត់រហូតដល់ខណ្ឌអធិការដ្ឋាន រដ្ឋបាលជលផលចតុមុខ សុទ្ធតែបានដឹងថាពីបទល្មើសទាំងនេះតែម្នាក់ៗមិនខ្ចីចេញមុខបង្ក្រាបគឺសម្ងំនាំគ្នាលាក់ខ្លួនពួនអាត្មាយកសមាគមន៏ឡូត៏នេសាទធ្វើជាដំបូលរួចឃុបឃិតគ្នាជាប្រព័ន្ធទទូលលុយពីបទល្មើសយ៉ាងស្ងាត់ស្ងៀម បណ្តែតបណ្តោយឲ្យជនជាតិវៀតណាមឆ្លងដែនចូលប្រព្រឹត្តបទល្មើសជលផលដោយសេរី ។
យោងតាមមាត្រា 103 ស្តីពីច្បាប់ជលផលចំពោះសកម្មភាពដែលប្រព្រឹត្តឡើងដោយមន្ត្រីរដ្ឋបាលជលផលត្រូវចាត់ទុកជាបទល្មើស និងត្រូវផ្តន្ទាទោសដាក់ពន្ធនាគារពី១ឆ្នាំទៅ៣ឆ្នាំ ពិន័យជាប្រាក់ពី៥លានរៀលរហូតដល់៥០លានរៀល ។ មានន័យថាមន្ត្រីជំនាញទាំងនោះផ្តល់ការអនុញ្ញាត្តិណាមួយដែលផ្ទុយនឹងបទប្បញ្ញាតិ្តនៃច្បាប់នេះ ។ ប៉ុន្តែច្បាប់ជលផលដែលតាក់តែងឡើងរបស់នាយកដ្ឋានរដ្ឋបាលជលផលហាក់គ្មានប្រសិទ្ធិ មិនដែលឃើញយកទៅប្រើប្រាស់ ឬ អនុវត្តទៅលើមន្ត្រីជលផលខិលខូចម្តងណាទេ ។ បានសេចក្តីថាច្បាប់នេះបង្កើតឡើងគ្រាន់ល្អមើល តែការអនុវត្តន៏ច្បាប់ហ្សេរ៉ូ និងមិនល្អស៊ី ។
ដោយសារតែច្បាប់ជលផលធូររលុងនេះឯងទើបធ្វើឲ្យមន្ត្រីជំនាញជលផលនៅខេត្តតាកែវតាមបណ្តាស្រុកពាក់ព័ន្ធបទល្មើសជលផលមិនខ្លាចញញើតថែមទាំងបើកដៃឲ្យជនជាតិវៀតណាមឆ្លងដែន ចូលមកនេសាទត្រីប្រើឧបករណ៍ល្មើសពេញផ្ទៃបឹងស្រុកអង្គរបុរី រួចឲ្យមេខ្យល់ជនជាតិវៀតណាមពីរនាក់ចេញមុខដើរប្រមូលលុយពីទូកនេសាទទាំងនោះយកចែកគ្នារាប់ពាន់ដុល្លាដែលករណីនេះជាប់ពាក់ព័ន្ធដល់អាជ្ញាធរស្រុក-ខេត្តតាកែវ ផងដែរ ។
ប្រភពមាត់ចាបមាត់ព្រាបបានខ្សឹបខ្សេវថា មន្ត្រីជលផលថ្នាក់លើរួមមានអធិការដ្ឋាន និងនាយកដ្ឋាន រដ្ឋបាលជលផលក៏បានទទួលលាភសក្ការ:ពីបទល្មើសជលផលនេះផងដែរ ទើបអ្វីៗស្ងាត់ស្ងៀមបែបនេះ ។
គួរបញ្ជាក់ថាបទល្មើសជលផលកំពុងកើតមានលើផ្ទៃបឹងក្នុងស្រុកអង្គរបុរីយ៉ាងគគ្រឹកគគ្រេងប្រព្រឹត្តដោយជនជាតិវៀតណាមឆ្លងដែនរួមមាន សៃយឺនយក្ស សៃយឺនស្បៃមុងខៀវ កន្ទយកណ្តុរ បក្តាម លបបង្កង និងលបត្រីរ៉ស់ ។
ដោយមើលឃើញពីស្ថានភាពនៃការបំផ្លាញមច្ឆាជាតិមានទំហំធំធេងបែបនេះប្រជាពលរដ្ឋនៅទូទាំងស្រុកអង្គរបុរីអំពាវនាវស្នើសុំឲ្យលោករដ្ឋមន្ត្រីក្រសួងកសិកម្មចាត់វិធានការចុះបង្ក្រាបជាបន្ទាន់ ពីព្រោះមន្ត្រីជំនាញជលផល និងមន្ត្រីអាជ្ញាធរដែនដីស្រុក ខេត្តនេះដេកដួលក្រោមឥទ្ធិពលលុយពីបទល្មើសទើបគ្មានវិធានការទប់ស្កាត់បង្ក្រាប ។ និយាយរួមបទល្មើសជលផលកើតមានរាល់ឆ្នាំនៅស្រុកអង្គរបុរីនេះ ៕
មតិយោបល់