នៅយប់ថ្ងៃទី០៩ខែកញ្ញា កន្លងទៅនេះ ក្រុមហ៊ុន Apple បានប្រកាសបង្ហាញ iPhone 6/6Plus រួមជាមួយនឹង Apple Pay ជាផ្លូវការ ដែលបានធ្វើឲ្យមហាជន និងក្រុមអ្នកគាំទ្រទាំងអស់មានការសប្បាយរីករាយយ៉ាងខ្លាំង។
តើអ្វីទៅជា Apple Pay ? Apple Pay (Mobile Payment) ជាសេវាកម្មថ្មីមួយដែលក្រុមហ៊ុន Apple បង្កើតឡើងសម្រាប់ការចាយវាយ ទិញទំនិញតាមរយៈទូរស័ព្ទ ដោយមិនចាំបាច់ប្រើប្រេឌីតកាត វិក័យប័ត្រ អ្នកគិតលុយ អ្វីទាំងអស់ ដោយគ្រាន់តែប្រើប្រាស់ទូរស័ព្ទដៃ នោះលោកអ្នកអាចទិញនូវទំនិញបានគ្រប់បែបយ៉ាង។
សម្រាប់សេវាកម្ម Apple Pay នេះ នឹងត្រូវដាក់ឲ្យប្រើប្រាស់នៅខែក្រោយ ហើយបើតាមការបញ្ជាក់របស់ Apple បច្ចុប្បន្នមានហាងជាង ២ម៉ឺនកន្លែងបានស្គាល់ និងអាចប្រើប្រាស់សេវាកម្មនេះ ប៉ុន្តែសម្រាប់ទីផ្សារតំបន់អាស៊ីវិញ ប្រហែលជាមិនទាន់មាននោះទេ ព្រោះថាវាត្រូវការ ការអភិវឌ្ឍន៍នូវ Software ថ្មីសម្រាប់ប្រើជាមួយទើបស្គាល់ ដោយក្នុងនោះ Apple បានប្រកាសនឹងផ្ដល់ជូន API ដល់ក្រុមអ្នកអភិវឌ្ឍន៍គ្រប់គ្នា។
គួរបញ្ជាក់ផងដែរថា សេវាកម្ម Mobile Payment ឬសេវាកម្មទិញទំនិញតាមរយៈទូរស័ព្ទនេះត្រូវបានអនុញ្ញាត និងប្រើប្រាស់នៅក្នុងប្រទេសជប៉ុនតាំងឆ្នាំ ២០០៥ ហើយបច្ចុប្បន្នក៏កំពុងតែដាក់ឲ្យប្រើប្រាស់ផងដែរ៕
មតិយោបល់