ខេត្តកំពត៖ ល្បែងតាយ ស៊ីវ គ្មានច្បាប់ទំលាប់ដែលកំពុងបើកលេងយ៉ាងក្រអើតដោយជ្រកក្រោមផ្លាកយីហោ កាស៊ីណូដឺវីមាណដែលមានទីតាំងក្នុងច្រកទ្វារអន្តរជាតិព្រែកចាក ស្ថិតក្នុងភូមិថ្កូវ ឃុំឫស្សីស្រុកខាងលិច ស្រុកកំពុងត្រាច ខេត្តកំពត នោះឥឡូវកាន់តែបើកស្វាគមន៍ភ្ញៀវកាន់តែទ្វេរឡើង ដែលធ្វើឲ្យថៅកែល្បែងតាយ ស៊ីវ ជាជនជាតិវៀតណាមម្នាក់នោះកាន់តែឡើងកូដពីមួយថ្ងៃទៅមួយថ្ងៃ។
ចំពោះការបើកលេងល្បែង តាយ ស៊ីវ ក្នុងបរិវេណកាស៊ីណូដឺវីមាណដោយចំហនេះ ក៏មានប្រភពអះអាងថាថៅកែតាយ ស៊ីវ មិនទាន់រត់ការច្បាប់នៅឡើយទេម្យ៉ាងទៀតល្បែងតាយ ស៊ីវ ខាងលើបើកចាក់ភ្នាល់១ដៃៗរាប់ពាន់ដុល្លា ថែមទាំងមានមនុស្សចោមរោមចាក់ស៊ីសងស្រែកហ៊ោកញ្ជ្រៀវពេញបរិវេណកាស៊ីណូ ប៉ុន្តែបែរជាគ្មានអាជ្ញាធរឬសមត្ថកិច្ចជំនាញណាម្នាក់ទៅស្រៀសសៃម្តងសោះ។ប្រភពដ៏ជឿជាក់ខាងលើបានបង្ហើបទៀតថា ការបើកល្បែងតាយ ស៊ីវ ក្នុងបរិវេណកាស៊ីណូ ដឺវីមាណ បានដោយរលូនបែបនេះ ដោយសារថៅកែជនជាតិវៀតណាមរូបនោះ សំអាងលើច្បាប់របស់កាសីុណូវីមាណតែប៉ុណ្ណោះទើបឆ្លៀតឱកាសមកសំងំបើកលេងសីុសងក្បែរៗនោះតែម្តង ព្រោះគេគិតថា ការបើកបនល្បែងក្នុងបរិវេណកាស៊ីណូពិតជាមានសុវត្ថិភាព គឺគ្មានអាជ្ញាធរឬសមត្ថកិច្ចជំនាញណាមួយមករំខានឡើយ ពិសេសជាងនេះទៅទៀត គ្មានខ្ទង់ចំណាយដូចម្ចាស់កាស៊ីណូនោះឡើយ ដោយគ្រាន់តែចំណាយបន្តិចបន្តួចជូនដល់អ្នកកាងមួយក្តាប់តូចប៉ុណ្ណោះ។ប្រភពបានបញ្ជាក់ថា ល្បែងតាយ ស៊ីវ ដែលកំពុងបើកលេង ដោយជ្រកក្រោមដំបូលកាស៊ីណូ ដឺវីមាណ នោះ ហាក់មានភាពក្រអើតគឺមិនខ្លាចច្បាប់ថែមទាំងគ្មានញញើតអាជ្ញាធរនិងសមត្ថកិច្ចតំបន់បន្តិចឡើយ កុំថាឡើយប៉ូលិស ប៉េអឹម សូម្បីស្ថាប័នជំនាញផ្សេងៗក៏ថៅកែល្បែងតាយ ស៊ីវ ម្នាក់នេះព្រឺផង ហើយប្រសិនមានគេសួនាំមេតាយ ស៊ីវ វៀតណាមនោះ បែរជាប្រាប់ថា ជារបស់កាស៊ីណូដឺវីមាណដែលមានច្បាប់ទម្លាប់ត្រឹមត្រូវ តែធាតុពិតលួចមកជ្រកក្រោមផ្លាកយីហោគេសោះ ហើយមេតាយ ស៊ីវ នេះ បើចាក់គឺស៊ីមិនដែលសងនោះទេ។
ទន្ទឹមនឹងមានលួចបើកល្បែងតាយ ស៊ីវ ខាងលើ ក៏មានគេលួចទំលាយថា នៅក្នុងទីប្រជុំជនស្រុកកំពុងត្រាច មានមេស៊ីសងកន្ទុយលេខ ជិត១០នាក់ដែលប្រកបអាជីវកម្មស្ទើដុះស្លែទៅហើយតែហាក់គ្មានអ្នកណាហ៊ានបង្ក្រាប ដូចជាមេឆ្នោត ឈ្មោះ ហ៊ា ហ៊ ម៉ែបញ្ញា ចែឌៀប គ្រូ ងន លីនិងពូប្រុស ដែលផ្ទះក្បែរសាលាឃុំអង្គសុរភី។
ទាក់ទិននឹងល្បែងតាយ ស៊ីវ ក៏ដូចជាល្បែងកន្ទុយលេខខាងលើប្រជាពលរដ្ឋសំណូមពរដល់សមត្ថកិច្ចខេត្តកំពត គួរតែតម្លើងសាច់ដុំចុះមកបង្ក្រាបយកស្នាដៃម្តងមើល។បើសមត្ថកិច្ចអាចបង្ក្រាបល្បែងដូចខាងលើនេះបានមែនពួកគាត់ពិតជាសប្បាយចិត្ត លែងមានទុក្ខកង្វល់ទៀតឡើយ៕
ព័ត៌មានជាតិ
មតិយោបល់