សៀមរាប៖ នេះជាលើកទី៣ហើយនៅក្នុងឆ្នាំ២០១៤ដែលផ្សារលើធំថ្មីនៃខេត្តសៀមរាបទទួលរងនូវការគំរាមកំហែងដោយទុស្សេចរន្តអគ្គិសនីបណ្តាលឲ្យឆាបឆេះខ្សែភ្លើងមួយចំនួនតែមិនបណ្តាលឲ្យឆេះរាលដាលដល់តូបលក់ដូររបស់អាជីវករឡើយ ព្រោះត្រូវគេជួយពន្លត់ទាន់ពេល ហើយករណីនេះអាជីវករលក់ដូរនៅផ្សារលើបានធ្វើការរិះគន់អ្នកគ្រប់គ្រងផ្សារលើធំថ្មីនិងអាជ្ញាធរពាក់ពន្ធ័នៃខេត្តសៀមរាបមិនអើពើសោះឡើយ ដោយមួយថ្ងៃៗអង្គុយចាំតែកើបលុយប៉ុណ្ណោះ។
ហេតុការបង្កឲ្យមានការភ្ញាក់ផ្អើលនេះកើតឡើងនៅវេលាម៉ោង៥និង៣០នាទីល្ងាចថ្ងៃ១៨ខែកញ្ញានៅកណ្តាលផ្សារលើធំថ្មីនៃក្រុងសៀមរាប។
សាក្សីនៅកន្លែងកើតហេតុបានប្រាប់ថា មុនកើតហេតុពួកខ្ញុំប្រាប់ជាងភ្លើងប្រចាំផ្សារនេះថា កាលពីថ្ងៃទី១៦ខែកញ្ញាមានករណីទុស្សេខ្សែភ្លើងនៅលើបង្គោលកណ្តាលផ្សារម្តងមកហើយដែលឃើញខ្សែរប៉ាត់រប៉ាយនៅតាមសសរកណ្តាល ពេលនោះជាងភ្លើងក៏បានមកបិទកុងតាក់ភ្លើងដើម្បីត្រួតពិនិត្យ ប៉ុន្តែរហូតមកដល់ថ្ងៃកើតហេតុ ខ្សែភ្លើងទាំងនោះនៅតែមានភាពរញ៉េរញ៉ៃដដែល។ ប្រភពពីអាជីករម្នាក់ទៀតបានឲ្យដឹងថា ចាប់តាំងពីពួកគាត់មកចូលលក់ដំបូង គាត់បានសង្កេតឃើញថា មានការទុស្សេឆាបឆេះខ្សែភ្លើងចំនួន៣ដងមកហើយនៅឆ្នាំ២០១៤នេះ ហើយករណីនេះពួកគាត់មិនដែលឃើញអ្នកគ្រប់គ្រងផ្សារនេះមកពិនិត្យមើលសោះឡើយ ដោយឃើញតែដើរប្រមូលលុយប៉ុណ្ណោះ។
សមត្ថកិច្ចបានឲ្យដឹងថា គ្រាន់តែមានសេចក្តីរាយការណ៍ពីសំណាក់អាជីវករថា មានករណីទុស្សេខ្សែភ្លើងនៅក្នងផ្សារលើធំថ្មីនេះភ្លាម លោកបានឲ្យកម្លាំងប្រចាំការចូលទៅជួយពន្លត់។សមត្ថកិច្ចបានបន្តឲ្យដឹងទៀតថា ក្នុងហេតុការគ្រោះអគ្គិភ័យនេះជាភ័ព្វសំណាងទីនោះមានបំពង់ពន្លត់អគ្គិភ័យច្រើនទើបអាចជួយពន្លត់បានទាន់ហេតុការមិនបណ្តាលឲ្យមានការរាលដាលដល់តូបលក់ដូរផ្សេងៗទៀតឡើយ ហើយក៏មិនមានខូចខាតដល់ទ្រព្យសម្បត្តិផ្សេងៗនោះទេ ដោយគ្រាន់តែម្នាក់ៗភ័យស្លន់ស្លោភ្នែកសព្រាត ខណៈពេលដែលឃើញហេតុការបែបនេះកើតឡើង។
ករណីនេះក្រុមអាជីវករបានធ្វើការសំណូមពរឲ្យអាជ្ញាធរពាក់ពន្ធ័ជួយគិតគូរករណីហានិភ័យនៅផ្សារលើធំថ្មីនេះផង ព្រោះខ្លាចមានករណីឆាបឆេះដូចនៅផ្សារដើមក្រឡាញ់ទៀត៕
មតិយោបល់