កំពង់ចាម៖កម្លាំងកងរាជអាវុធហត្ថខេត្តកំពង់ចាម បានបង្ក្រាបបានរថយន្តដឹកឈើក្រញូង មួយគ្រឿងដែលមានផ្ទុកឈើក្រញូងសុទ្ធ ប្រមាណជិត២តោន នៅយប់ថ្ងៃទី២៧ ខែកញ្ញា ឆ្នាំ២០១៤ ចំណុចភូមិខែលជ័យ ឃុំអូរស្វាយ ស្រុកកំពង់សៀម ខេត្តកំពង់ចាម ។
លោក ឧត្តមសេនីយ៍ត្រី សោ សាវឿន មេបញ្ជាការកងរាជអាវុធហត្ថខេត្តកំពង់ចាម បានឲ្យដឹងថា នៅយប់កើតហេតុ កម្លាំងអាវុធហត្ថខេត្ត បានបើករថយន្តល្បាតតាមដងផ្លូវជាតិលេខ៧ លុះទៅដល់ចំណុចផ្លូវបំបែកត្រើង ក៏បានប្រទះឃើញរថយន្តកូរ៉េ ចំណុះ២តោនកន្លះ ក្បាលពណ៌ស ពាក់ស្លាកលេខ ភ្នំ ពេ ញ 3A.5790 ឈប់នៅតាមដងផ្លូវ ចំណែកអ្នកបើកបរ បានរត់គេចខ្លួនបន្ទាប់ពីបានឃើញ កម្លាំងយើង ទៅដល់ ។ បន្ទាប់ពីឃើញហេតុការណ៍ដូច្នេះ លោកបានបញ្ជាឲ្យកម្លាំងអាវុធហត្ថ នាំយករថយន្តនោះ មករក្សាទុកនៅទីបញ្ជាការដ្ឋានអាវុធហត្ថខេត្ត។
លុះព្រឹកថ្ងៃទី២៨ ទើប សមត្ថកិច្ចយើងរួមមាន៖ ស្ថាប័នអយ្យការ និងមន្ត្រីរដ្ឋបាលព្រៃឈើមកធ្វើការពិនិត្យរួមគ្នា ហើយបញ្ជូនរថយន្តល្មើស ដែលមានផ្ទុកឈើក្រញ៉ូងនោះ ទៅឲ្យខណ្ឌរដ្ឋបាលព្រៃឈើ ថ្លឹងឃើញទម្ងន់ ១៤២៦គីឡូក្រាម រួច អាវុធហត្ថ បានប្រគល់រថយន្តនិងឈើក្រញូងនោះឲ្យទៅខាងខណ្ឌរដ្ឋបាលព្រៃឈើកំពង់ចាម និងចាត់ការទៅតាមនិតិវិធី៕
មតិយោបល់