បាត់ដំបង៖ ដែនភ្នំសំកុះគឺជាតំបន់ភ្នំដ៏វែងអន្លាយដោយលាតសន្ធឹងលើខេត្តចំនួន 3 គឺខេត្តបាត់ដំបងខេត្តពោធិសាត់ និងខេត្តកោះកុង ហើយក៏ជាតំបន់ដែលគេកំណត់ទុកជាដែនអភិរក្សផងដែរប៉ុន្តែបែរជាកម្លាំងបរិស្ថានដែលត្រួតត្រាលើតំបន់នេះមានចរិតធូររលុងនិងផ្សំគំនិតជាមួយបទល្មើសទៅវិញ។គេសង្គេតឃើញថាកាលពីរយ:ពេលប៉ុន្មានឆ្នាំមុនកម្លាំងបរិស្ថានដែលភ្នំសំកុះដែលគ្រប់គ្រងដោយលោក រ៉ុង សុភក្ត្រ័ ព្រមទាំងមានបំពាក់អាវុធគ្រប់ដៃផងនោះបានធ្វើការយាមកាមការពារព្រៃឈើបានយ៉ាងម៉ឹងម៉ាត់ដែលធ្វើឲ្យព្រៃឈើក្នុងតំបន់នេះហាក់មានភាពស្រស់បំព្រងមិនត្រឹមតែប៉ុណ្ណោះកម្លាំងបរិស្ថានបានធ្វើការស្ទាក់ចាប់បាននូវបទល្មើសព្រៃឈើជាញឹកញាប់ថែមទៀត។
ប៉ុន្តែក្រោយពីប៉ុន្មានឆ្នាំកន្លងទៅនេះការសហការរវាងកម្លាំងបរិស្ថាននិងកម្លាំង MJPហាក់មានភាពរយាលពីគ្នាទៅវិញដែលជាកត្តាធ្វើឲ្យលោក រ៉ុង សុភក្ត្រ័ ចាប់ផ្តើមបន្ធូដៃដល់បទល្មើសនានារហូតដល់មានប្រភពមួយចំនួនបានរាយការមកថាស្ទើរតែរៀងរាល់ថ្ងៃគឺមានគោយន្តទាំងខ្សែៗបានដឹកឈើបន្តកន្ទុយគ្នាចេញពីតំបន់ដែនភ្នំសំកុះឆ្ពោះទៅតាមចំនុចក្រពើ 2 និងតាមច្រកចង្អៀត ឯមួយផ្នែកទៀតគេបានដឹកតាមច្រកវាលចម្បាំងក្នុងឃុំកំពង់ល្ពៅនិងឆ្ពោះទៅចំនុចអក្សរតេ។
នៅក្នុងបទល្មើសព្រៃឈើនេះគឺភាគច្រើនមានឈើចំនួន 3 ប្រភេទគឺមាន បេង ធ្នង់ និងនាងនួនដែលជាប្រភេទឈើប្រណិតហើយក៏ជាប្រភេទឈើដែលឈ្មួញត្រូវការចាំបាច់ផងដែរ ។
បើតាមប្រភពច្បាស់ការមួយបានរាយការមកថានៅតាមចំនុចទាំងពីរដែលប្រជាពលរដ្ឋបានដឹកគោយន្តយកមកស្តុកទុកនេះគឺមានមេឈ្មួញដ៏ធំចំនួនពីរនាក់ដែលតែងតែឈរចាំប្រមូលទិញឈើទាំងនោះគ្មានសល់ដោយគេបានទំនាក់ទំនងត្រូវរ៉ូវគ្នាទាំងអស់ជាមួយស្ថាប័ននានាពិសេសអស់លោកមេព្រៃដែលឈរជើងនៅតំបន់នោះផ្ទាល់តែម្តង ដែលធ្វើឲ្យការដឹកឈើរបស់ពួកគេចូលមកក្នុងក្រុងបាត់ដំបងមានភាពរលូនជាប់ជាប្រចាំគឺពុំមានអ្នកណាហ៊ានរារាំងឡើយ ។
មេក្លោងទាំងពីរនោះគឺម្នាក់ឈ្មោះ សល់ ជាអ្នកចាំទិញឈើដែលមកតាមច្រកចង្អៀតនិង
ក្រពើ 2 ដោយគេដឹកកាត់តាមស្រុកគាស់ក្រឡរួចឡើងមកក្រុងបាត់ដំបង ចំណែកច្រកកំពង់ល្ពៅនិង
អក្សរតេគឺមានឈ្មោះ ត្រា ជាអ្នកឈរចាំប្រមូលទិញដោយគេបានជួលរថយន្តរបស់ឈ្មោះ ណាត
ដែលមានម៉ាកកាមរីច្នៃធ្វើជាទ្រុងដែកដើម្បីដឹកចូលទៅកាន់ក្រុងបាត់ដំបងដែរដោយដង្ខៅទាំងពីរនាក់
នេះមិនសូវត្រូវគ្នាប៉ុន្មានទេដោយសារតែគេមានមុខរបរដូចគ្នា. ។
តទៅមុខបើអស់លោកមេព្រៃ និងមន្ត្រីបរិស្ថានដែនភ្នំសំកុះត្រូវរ៉ូវគ្នាជាមួយបទល្មើសព្រៃឈើបែបនេះតើអនាគតតំបន់អភិរក្សនឹងក្លាយទៅជាយ៉ាងណាទៅវិញ? ។
មតិយោបល់