ជនល្មើសឈ្មោះ ស ផល្លា ដែលជាប់ចោទពីបទ ប៉ុនប៉ងមនុស្សឃាត ត្រួវចៅក្រមស៊ើបសួរ លោក តេង រតនា និងជាប្រធានតុលាការ ខេត្តកំពង់ឆ្នាំង បានធ្វើការសំរេចមិនឃុំខ្លួន ដោយដាក់ឲ្យស្ថិតនៅក្រោមការត្រួតពិនិត្យ របស់តុលាការខេត្តកំពង់ឆ្នាំង ។
ករណីនេះ ត្រូវបានមហាជនរិះគន់ថា ជនល្មើសបានយកពូថៅ ដេញកាប់គេ ធ្វើឲ្យមនុស្សប្រមាណ១០០នាក់ រត់ជាន់ជើងគ្នា ហើយកម្លាំងកងរាជអាវុធហត្ថ បានចាប់ឃាត់ខ្លួនជនល្មើសដោយយោងតាមដីការ លេខ២០០២ ចុះថ្ងៃទី២០ ខែតុលា ឆ្នាំ២០១៤ របស់លោក គឹម ហុងសាន ព្រះរាជអាជ្ញារង អមសាលាដំបូង ខត្តកំពង់ឆ្នាំង និងបានបញ្ជូនជនល្មើស ឲ្យតុលាការចាត់ការ តាមផ្លូវច្បាប់ តែបែរជាតុលាការ ធ្វើការដោះលែងជនល្មើស ឈ្មោះ ស ផល្លា ដោយមិនធ្វើការឃុំខ្លួនទៅវិញ ។ លើសពីនេះទៅទៀត ប្រជាពលរដ្ឋ បានរិះគន់ថា ដីការលេខ២០០២ ចុះថ្ងៃទី២០ ខែតុលា ឆ្នាំ២០១៤ របស់លោក គឹម ហុងសាន ព្រះរាជអាជ្ញារង អមសាលាដំបូង ខត្តកំពង់ឆ្នាំង គឺឲ្យចាប់ខ្លួនជនល្មើស ប៉ុន្តែពេលដែលសមត្ថកិច្ច ចាប់ខ្លួនជនល្មើស តាមដីកា និងបានបញ្ជូនសំណុំរឿង មកដល់ដៃចៅក្រមលោក តេង រតនា ដែលជាប្រធានតុលាការ ខេត្តកំពង់ឆ្នាំង បែរជាសំរេចមិនឃុំខ្លួនជនល្មើសទៅវិញ ។
ពួកគាត់បានលើកថែមទៀតថា ប្រហែលជាកាប់មនុស្សឲ្យស្លាប់សិន ហើយមើលទៅទើបបានឃុំខ្លួន? បើយ៉ាងដូច្នេះ តើសុវត្តិភាពភូមិឃុំ៩ចំណុច នៅឯណា? ចុះបើថ្ងៃក្រោយ ជនល្មើស រឺក៏អ្នកផ្សេង ដេញកាប់មនុស្សពេញខេត្ត តើតុលាការ គិតយ៉ាងម្តេចទៅវិញ? ហើយសមត្ថកិច្ច ចាប់ខ្លួនជនល្មើស បានប្រយោជន៏អ្វី ហើយដីការរបស់ព្រះរាជអាជ្ញាខេត្ត ក៏លែងមានតំលៃ ក្នុងការអនុវត្តន៏ច្បាប់ដែរ ។
បើយោងតាមប្រភព ពីប្រជាពលរដ្ឋ បាននិយាយថា ឈ្មោះ ស ផល្លា បាននិយាយនៅតាមហាងកាហ្វេរថា បានត្រៀមលុយចំនួន៥០០០ដុល្លារ ដើម្បីទុកធ្វើការសូកប៉ាន់ ទៅលើមន្ត្រីមួយចំនួន ដែលអាចជួយរូបគេបាន ។
សូមរម្លឹកថា ឈ្មោះ ស ផល្លា ត្រូវបានកម្លាំងកងរាជអាវុធហត្ថ ខេត្តកំពង់ឆ្នាំង ចាប់ឃាត់ខ្លួនពីបទប៉ុនប៉ងមនុស្សឃាត ។ ការចាប់ជនសង្ស័យម្នាក់នេះ ធ្វើឡើងដោយអនុវត្ត តាមដីការលេខ២០០២ ចុះថ្ងៃទី២០ ខែតុលា ឆ្នាំ២០១៤ របស់លោក គឹម ហុងសាន ព្រះរាជអាជ្ញារង អមសាលាដំបូង ខេត្តកំពង់ឆ្នាំង។
លោក លឹម ហាក់ នាយការិយាល័យ ស្រាវជ្រាវបទល្មើសព្រហ្មទណ្ឌ នៃទីបញ្ជាការដ្ឋានកងរាជអាវុធហត្ថ ខេត្តកំពង់ឆ្នាំង បានអោយដឹងថា ជនសង្ស័យដែលត្រូវឃាត់ខ្លួននេះ ឈ្មោះ ស ផល្លា ភេទប្រុស អាយុ៣៥ឆ្នាំ មានទីលំនៅក្នុងសង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង ពីបទប៉ុនប៉ងមនុស្សឃាត ដែលបានប្រព្រឹត្ត កាលពីថ្ងៃទី២៧ ខែកញ្ញា ឆ្នាំ២០១៤។
ឈ្មោះ ស ផល្លា នេះ ជាអ្នកគួកជេរម៉ូតូ និងជាប្រជាការពារភូមិផងដែរ បានយកពូថៅ ដែលមានដងប្រវែងជិតមួយម៉ែត្រ ដេញកាប់សម្លាប់ឈ្មោះ លន់ ឡេង ក្រោយមានទំនាស់និងគ្នា នៅហាងកាហ្វេមួយកន្លែង ស្ថិតក្នុងសង្កាត់ប្អេរ ក្រុងកំពង់ឆ្នាំង ។
ពាក់ព័ន្ធនិងករណីខាងលើនេះ លោកចៅក្រមលោក តេង រតនា និងជាប្រធានតុលាការខេត្ត ពេលអ្នកសារពត៌មានយើង ទូរស័ព្ទសុំការពន្យល់ពាក់ព័ន្ធរឿងរ៉ាវនេះ លោកមិនបានពន្យល់អ្វីឡើយ ដោយគ្រាន់តែនិយាយថា បើចង់ដឹង សូមអញ្ចើញមកតុលាការ លោកមិនអាចប្រាប់តាមទូរស័ព្ទបានទេ ព្រះជារឿងសម្ងាត់ ៕
មតិយោបល់