ភ្នំពេញ ៖ បុរសចំណាស់ជាអ្នករត់ម៉ូតូឌុបម្នាក់ត្រូវជនមិនស្គាល់អត្តសញ្ញាណដាក់ថ្នាំសណ្តំយកម៉ូតូមួយគ្រឿងម៉ាកហុងដាឌ្រីម សេ១២៥ ស៊េរីឆ្នាំ២០០៦ បង្កឱ្យមានការភ្ញាក់ដល់សមត្ថកិច្ចនៅពីវេលាម៉ោង
៩ និង៥០នាទីយប់ ថ្ងៃទី២៧ តុលា ២០១៤ នៅចំណុចផ្លូវបេតុងវត្តអង្គតាមិញ ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
ប្រភពព័ត៌មានពីបុរសរងគ្រោះដែលប្រាប់អ្នកយកព័ត៌មានក្នុងសភាពរវើរវាយ បានឱ្យដឹងថាកាលពី វេលាម៉ោង១១ព្រឹក ថ្ងៃកើតហេតុ បុរសរងគ្រោះជិះម៉ូតូ ម៉ាកហុងដាឌ្រីម សេ១២៥ ស៊េរីឆ្នាំ២០០៦ ពណ៌ខ្មៅ មួយគ្រឿង មិនចាំស្លាកលេខ ឌុបស្ត្រីម្នាក់ ខណៈធ្វើដំណើរមកដល់ចំណុចផ្លូវបេតុងវត្តអង្គតាមិញ ក៏មានរថយន្តមួយគ្រឿងបានបើកមកគៀរម៉ូតូរបស់គាត់អោយដួលទៅលើថ្នល់ បណ្តាលឲ្យរងរបួសស្រាលរលាត់ដៃរលាត់ជើង ពេលនោះមិនដឹងជាយ៉ាងម៉េចស្រាប់តែគាត់លែងដឹងខ្លួនតែម្តង ។ ចំណែកប្រភពពីប្រជាពលរដ្ឋវិញបានឱ្យដឹងថា ពួកគាត់បានឃើញបុរសខាងលើដេកសន្លប់នៅលើផ្លូវបេតុងវត្តអង្គតាមិញ ហើយក៏នាំគ្នាជួយលើកដាក់នៅលើគ្រែ ធ្វើចលនាដង្ហើម រិតប្រេងខ្យល់ទើបបុរសរងគ្រោះដឹងខ្លួនឡើងវិញទាំងសភាពរវើរវាយ ហើយក៏បានទូរស័ព្ទប្រាប់សមត្ថកិច្ចឱ្យមកពិនិត្យ ។
ក្រោយពីសមត្ថកិច្ចបានចុះមកពិនត្យហើយនោះបុរសរងគ្រោះខាងលើត្រូវបានសមត្ថកិច្ចហៅ រថយន្តសាមុយមកទទួលយកទៅសង្គ្រោះនៅមន្ទីរពេទ្យ ៕
មតិយោបល់