កំពង់ឆ្នាំង៖នៅលើចិញ្ចើមផ្លូវក្នុងទីប្រជុំជនផ្សារលើ ផ្សារក្រោមក្នុងសង្កាត់ផ្សារឆ្នាំង ក្រុងកំពង់ឆ្នាំង គេសង្កេតឃើញនៅតាមមុខផ្ទះអាជីវករមួយចំនួន បានដាក់សម្ភារៈលក់ដូរលៀនលយមកលើចិញ្ចើមផ្លូវដើរសាធារណៈ ខ្លះបានហៀរចូលលើផ្លូវកៅស៊ូទៀតផង។ ទង្វើខាងលើនេះ បានធ្វើអោយប៉ះពាល់ដល់សណ្តាប់ធ្នាប់ក្នុងក្រុង ធ្វើអោយរាំងស្ទះដល់ការធ្វើចរាចរណ៍ដល់អ្នកថ្មើរជើងនិងក៏ធ្លាប់បង្កអោយមានគ្រោះថ្នាក់ចរាចរណ៍ផងដែរ។ករណីខាងលើនេះសមត្ថកិច្ចមានគំរោងចាប់ពិន័យតាមផ្លូវច្បាប់នៅសប្តាហ៍ក្រោយ។
លោក ហង្ស ប៊ុនហាក់ អធិការរងនគលបាលក្រុងកំពង់ឆ្នាំងទទួលផ្នែកសណ្តាប់ធ្នាប់បានអោយដឹងនៅព្រឹកថ្ងៃទី០១ ខែវិច្ឆិកា ឆ្នាំ២០១៤នេះថា៖ តាមផែនការរបស់គណៈកម្មាធិការរៀបចំសណ្តាប់ធ្នាប់និងកែលំអរសោភ័ណភាពក្រុងកំពង់ឆ្នាំង បានដាក់ផែនការអោយសមត្ថកិច្ចនគរបាលក្រុងកំពង់ឆ្នាំង ធ្វើការអប់រំណែនាំដល់អាជីវករលក់ដូរទាំងអស់មិនអនុញ្ញាតិអោយដាក់តាំងសម្ភារៈលក់ដូរនៅលើចិញ្ចើមផ្លូវដើរសាធារណៈក្នុងទីប្រជុំជនផ្សារលើនិងផ្សារក្រោមឡើយ។ករណីនៅតែមិនគោរពតាមការណែនាំខាងលើនេះទេ នៅក្នុងសប្តាហ៍ខាងមុខនេះ សមត្ថកិច្ចនឹងធ្វើការរឹបអូសសម្ភារៈទាំងនោះ ដើម្បីធ្វើការពិន័យប្រាក់ពី ១ម៉ឺនរៀលដល់១០ម៉ឺនរៀល តាមប្រកាសក្រសួងមហាផ្ទៃ ករណីនៅតែមិនរៀងចាល សមត្ថកិច្ចនឹងធ្វើការពិន័យទ្វេដងតាមផ្លូវច្បាប់។
គេបានដឹងថាការដាក់សម្ភារៈលក់ដូរនៅតាមមុខផ្ទះលើចិញ្ចើមផ្លូវដើរសាធារណៈ កន្លងមកបានធ្វើអោយបាត់បង់សោភ័ណភាព ធ្វើអោយបាត់បង់សណ្តាប់ធ្នាប់សាធារណៈ ធ្វើអោយរាំងស្ទះការធ្វើដំណើររបស់អ្នកថ្មើរជើង និងក៍ធ្លាប់បង្កអោយមានគ្រោះថ្នាក់ចរា ចរណ៍ផងដែរ។បញ្ហាខាងលើនេះ បងប្អូនអាជីវករលក់ដូរទាំងអស់គួរតែយល់ដឹង និងគោ រពតាមការណែនាំរបស់សមត្ថកិច្ចនិងអាជ្ញាធរក្រុង បើពុំនោះទេប្រាកដជាត្រូវសមត្ថកិច្ចចាប់ផាកពិន័យមិនខានឡើយ។
លោកអធិការរងនគរបាលក្រុងកំពង់ឆ្នាំងបានអោយដឹងទៀតថា៖នៅលើចិញ្ចើមផ្លូវតាមចំណុចដែលក្រុមហ៊ុនអង្គការចៃកាកសាងផ្លូវកៅស៊ូថ្មីក្នុងទីប្រជុំជនក្រុងកំពង់ឆ្នាំងមិនអនុញ្ញាតិអោយប្រជាពលរដ្ឋដែលមានផ្ទះនៅតាមចិញ្ចើមផ្លូវទាំងនោះចាក់សាបដោយខ្លួនឯងនៅលើចិញ្ចើមផ្លូវមុខផ្ទះរបស់ខ្លួនឡើយ។លើចិញ្ចើមផ្លូវទាំងអស់នេះគឹអង្គការចៃកាបានមានគំរោងរៀបការ៉ូការ៉ូឡា ដើម្បីលើកសោភ័ណភាពចិញ្ចើមផ្លូវក្នុងទីក្រុងអោយបានល្អ។ចំណែកប្រជាពលរដ្ឋដែលបានចាក់សាបនៅលើផ្លូវសាធារណៈ នៅតាមមុខផ្ទះនោះត្រូវតែវាយចេញដើម្បីអនុវត្តតាមគំរោងក្រុមហ៊ុនចៃកា៕
មតិយោបល់