សេអ៊ូល៖ កាសែត WSJ បានចុះផ្សាយថា ក្រុមហ៊ុន Samsung កំពុងពិចារណាក្នុងការដកតំណែងលោក J.K. Shin ដែលជាអ្នកគ្រប់គ្រង់ជីវកម្មទូរស័ព្ទចល័ត និង Tablet។ នេះបើយោងតាមប្រភពព័ត៌មានចចាមអារ៉ាមមួយបានបង្ហើបឲ្យដឹង។
ដើមហេតុដែលឈានដល់ការដកតំណែងនេះត្រូវបានគេយល់ឃើញថា មកពីទីផ្សារទូរស័ព្ទចល័ត និងស្មាតហ្វូនរបស់ Samsung ធ្លាក់ចុះ ដោយនៅត្រីមាសទី៣ កន្លងទៅនេះ បានធ្លាក់ចុះជាង ៦០ភាគរយ បើធៀបនឹងឆ្នាំ ២០១៣ ចំណែកការលក់ Samsung Galaxy S5 វិញ តិចជាងការរំពឹងទុក និងតិចជាងការលក់ Samsung Galaxy S4។
ប្រភពដដែលបានបន្តទៀតថា លោក J.K. Shin អាចនឹងត្រូវដកចេញ ហើយជំនួសមកវិញនូវលោក B.K. Yoon សហនាយកប្រតិបត្តិ Samsung និងជាអ្នកគ្រប់គ្រងអាជីវកម្មទូរទស្សន៍ ទូទឹកកក និងគ្រឿងបរិក្ខាផ្ទះ។
គួរបញ្ជាក់ផងដែរថា Samsung ត្រូវបានបង្កើតឡើងដោយលោក Lee Byung-chul ក្រោយពីទទួលមរណភាព លោក Lee Kun-hee ត្រូវជាកូនប្រុសក៏បានឡើងកាន់តំណែងជំនួស ប៉ុន្តែនៅពេលនេះគាត់បានចូលសម្រាកព្យាបាលជំងឺបេះដួងនៅមន្ទីរ ហើយកិច្ចការមួយចំនួនត្រូវធ្លាក់ទៅលើលោក Jay Y. Lee ត្រូវជាកូនប្រុសរបស់លោក Lee Kun-hee និងជាចៅប្រុសរបស់លោក Lee Byung-chul ហើយបច្ចុប្បន្ននេះ Samsung Group មានសហនាយប្រតិបត្តិចំនួន ៣រូប មានដូចជាលោក B.K. Yoon គ្រប់គ្រង់ផ្នែកទូរទស្សន៍ ទូទឹកកក និងគ្រឿងបរិក្ខាគេហរដ្ឋាន, លោក J.K. Shin គ្រប់គ្រង់អាជីវកម្មទូរស័ព្ទចល័ត និង Tablet, លោក Kwon Oh-Hyun គ្រប់គ្រង់អាជីវកម្មផលិតផលពាក់កណ្ដាលសម្រេច និងអេក្រង់៕
មតិយោបល់