រាជរដ្ឋាភិបាលប្រទេសជប៉ុន គ្រោងនិងផ្តល់ជំនួយឥតសំណងមួយ ដល់រាជរដ្ឋាភិបាលកម្ពុជា ក្នុងការជួសជុលស្ពានជ្រោយចង្វា ចុងឆ្នាំ២០១៥ខាងមុខនេះ ព្រោះស្ពាននេះ គឺជាសមិទ្ធផលមួយ ប្រកបដោយអនុស្សាវរីយ៍ និងជាចំណងក្នុងការទំនាក់ទំនងការទូត និងសហប្រតិបត្តិការយ៉ាងល្អ រវាងប្រទេសទាំងពីរ កម្ពុជា-ជប៉ុន ចាប់តាំងពីទសវត្សឆ្នាំ៦០មកម្ល៉េះ។
សពថ្ងៃនេះ ស្ពានជ្រោយចង្វា កំពុងតែឈានទៅរកភាពចាស់ ទ្រុឌទ្រោមយ៉ាងខ្លាំង ។ ហើយកន្លង ទៅ អាជ្ញាធររាជធានីភ្នំពេញ បានប្រកាសហាម មិនឲ្យរថយន្តធុនធំ ដែលមានផ្ទុកទំនិញច្រើន ឆ្លងកាត់ស្ពាននេះទេ ។
លោក ឈឹម ផល្លា មន្ត្រីជំនាញស្ពានថ្នល់ ស្ថិតក្នុងគំរោងជំនួយប្រទេសជប៉ុន នៅក្រសួងសាធារណការ និងដឹកជញ្ជូន បានប្រាប់ឲ្យដឹងថា រដ្ឋាភិបាលជប៉ុន គ្រោងផ្តល់ជំនួយឥតសំណង ដល់រាជរដ្ឋាភិបាលកម្ពុជា សម្រាប់ការជួសជុល ស្ពានជ្រោយចង្វា នៅចុងឆ្នាំ២០១៥ខាងមុខនេះ ។ ក៏ប៉ុន្តែមុននឹងផ្តើមជួសជុលឡើងវិញ ជប៉ុនត្រូវជ្រើសរើស រកក្រុមហ៊ុនបច្ចេកទេសមួយ មកសិក្សាឲ្យបានលំអិត និងវាយតម្លៃការខូចខាត ការចំណាយ លើការជួសជុលទាំងអស់នេះ ។ ហើយរដ្ឋាភិបាល និងធ្វើការដេញថ្លៃ រកក្រុមហ៊ុនមួយ សាងសង់។
លោកបានបញ្ជាក់ថា ស្ពានជ្រោយចង្វានេះ មានអាយុកាល ជាង៥០ហើយ ។ ថ្វីត្បិតតែស្ពាននេះ ដាច់ម្តងចំពាក់កណ្តាលតួស្ពាន ក្នុងសម័យសង្គ្រាមក៏ដោយ ក៏ត្រូវធ្វើការកែលំអ និងជួសជុលឡើងវិញដែរ ។ ក្នុងឆ្នាំ១៩៩២ រដ្ឋាភិបាលជប៉ុន បានសំរេចចិត្ត តស្ពាននេះ ឲ្យដំណើរឡើងវិញ រហូតមកដល់សព្វថ្ងៃនេះ។ ស្ពាននេះមានបណ្តោយ ប្រវែងជាង៧០០ម៉ែត្រ ទទឹងស្ពាន មានប្រវែង១៣ម៉ែត្រ ជាស្ពានយុទ្ធសាស្ត្រ ឆ្លងកាត់ទន្លេសាប បំរើចរន្តសេដ្ឋកិច្ចឆ្លងកាត់ ដឹកជញ្ជូនពីក្រុងភ្នំពេញ ទៅបណ្តាខេត្ត នៅភូមិភាគឦសាន្ត និងភាគឧត្តរ នៃប្រទេសកម្ពុជា ។ ស្ពានជ្រោយចង្វា គឺជាស្ពានដែលបានកើតឡើងមុនគេ ក្នុងប្រទេសកម្ពុជា ក្នុងចំណោមស្ពានធំៗ វែងៗ ដែលកំពុងកើតឡើងក្នុងពេលបច្ចុប្បន្ននេះ ។
ទោះជាយ៉ាងណាក៏ដោយ ការចំណាយថវិកា លើការជួសជុលស្ពានជ្រោយចង្វានេះ នៅមិនទាន់វាយតម្លៃ និងសន្និដ្ឋានច្បាស់លាស់នៅឡើយទេ ៕
ព័ត៌មានជាតិ
មតិយោបល់