កំពង់ឆ្នាំង៖ ក្រោយពីសមត្ថកិច្ចបានធ្វើការអប់រំ និងធ្វើកិច្ចសន្យាជាច្រើនលើកជាមួយអាជីវករលក់ដូរនៅផ្សារក្រោមស្តីពីការលក់ដូរឥតសណ្តាប់ធ្នាប់ គឺអាជីវករមិនគោរពកិច្ចសន្យាឡើយ ទើបនៅព្រឹកថ្ងៃទី១១ ខែធ្នូ ឆ្នាំ ២០១៤នេះ លោកអភិបាលក្រុងកំពង់ឆ្នាំងបានដឹកនាំសមត្ថកិច្ចចំរុះរៀបចំសណ្តាប់ និងណែនាំអប់រំជាលើកចុងក្រោយ។
លោក ហៃ មនោរម្យ អភិបាលក្រុងកំពង់ឆ្នាំងបានថ្លែងអោយដឹងថា៖ក្រោយពីមានការឯកភាពពីគណៈកម្មាការរៀបចំសណ្តាប់ធ្នាប់ និងសោភ័ណ្ឌភាពខេត្តកំពង់ឆ្នាំង លោកបានដឹកនាំកម្លាំងសមត្ថកិច្ចចំរុះប្រមាណជាង៣០នាក់ រួមមាន៖នគរបាលក្រុង.ខេត្ត កងរាជអាវុធហត្ថក្រុង រុះរើឥវ៉ាន់មួយចំនួន និងសំយ៉ាប ឆ័ត្រ ដែលអាជីវករដាក់លក់ដូរលានលយមកលើចិញ្ចើមផ្លូវសាធារណៈ និងនៅលើសួនច្បារ ដែលធ្វើអោយប៉ះពាល់ដល់ការធ្វើចរាចរណ៍ សណ្តាប់ធ្នាប់ របៀបរៀបរយ និងសោភ័ណ្ឌភាពក្នុងក្រុងកំពង់ឆ្នាំង។
ចំណុចដែលសមត្ថកិច្ចចំរុះរុះរើនិងអប់រំណែនាំនោះរួមមាន៖ទីតាំងលក់ដូរពីងពង់ ស្លឹក បង្គោល, ចំណុចអ្នកលក់ដូរនៅលើសួនច្បាត្រីកាហោផ្សារក្រោម, ចំណុចកំពង់ផែទេសចរណ៍ដើមពោធិ៍ ,ចំណុចសួនច្បារនាងសុវណ្ណមច្ឆា ,ចំណុចផ្ទះល្វែងជួរមាត់ទន្លេផ្សារក្រោម និងចំណុចពីផ្ទះល្វែងរោងល្ខោន រហូតមកដល់វត្តយាយទេព។
លោក ហៃ មនោរម្យ បានបញ្ជាក់អោយដឹងថា៖កន្លងមកអាជ្ញាធរ និងសមត្ថកិច្ចបាន ធ្វើការណែរនាំ អប់រំ ធ្វើកិច្ចសន្យាជាច្រើនលើកច្រើនសាទាំងនៅផ្សារលើ និងផ្សារក្រោម ក៍ប៉ុន្តែអាជីវករភាគច្រើនមិនបានគោរពការណែរនាំ និងកិច្ចសន្យារបស់ខ្លួនឡើយ។តាមគោលការណ៍របស់គណៈកម្មាការរៀបចំសណ្តាប់ និងសោភ័ណ្ឌភាពខេត្តកំពង់ឆ្នាំងបានកំណត់ថា៖ ចាប់ពីថ្ងៃច័ន្ទ ទី១៥ ខែធ្នូតទៅ ប្រសិនបើអាជីវករនៅតែមិនគោរពតាមផែនការ ណែនាំនេះទេ អាជ្ញាធរនិងសមត្ថកិច្ចក្រុងកំពង់ឆ្នាំង នឹងចាត់វិធានការរដ្ឋបាលរឹបអូសឥវ៉ាន់ដែលដាក់លក់លានលយ និងធ្វើការផាកពិន័យទៅតាមបញ្ញតិច្បាប់។
ដោយឡែកនៅចំណុចមាត់ទន្លេដើមពោធិ និងសួននាងត្រីគល់រាំងមិនអនុញាតិអោយមានការដាក់ឥវ៉ាន់លក់ដូរទៀតទេ។ចំណែកនៅសួនច្បារនាងសុវណ្ណមច្ឆាវិញ គឺអនុញាតិអោយលក់តែបង្អែមនំចំណីសំរាប់ភ្ញៀវទេសចរណ៍ប៉ុណ្ណោះ គឺចាប់ពីម៉ោង៣រសៀលរហូតដល់យប់ និងរើគ្រែលក់ដូរទាំងនោះចេញអោយអស់ មិនអនុញាតិអោយទុកគ្រែលក់ដូរនៅពេលថ្ងៃឡើយ។
ប្រជាពលរដ្ឋនៅក្នុងក្រុងកំពង់ឆ្នាំងបានរិះគន់ថា ការរៀបចំសណ្តាប់ធ្នាប់លក់ដូរនៅ តាមទីតាំងទាំងអស់ខាងលើនេះ ជារៀងរាល់ឆ្នាំអាជ្ញាធរនិងសមត្ថកិច្ចក្រុងកំពង់ឆ្នាំងតែងតែធ្វើកិច្ច ការងារនេះជាបន្តបន្ទាប់ ប៉ុន្តែហាក់ដូចជាមិនមានប្រសិទ្ធភាពឡើយ។ប្រជាពលរដ្ឋសង្ឃឹមថា ចាប់ពីថ្ងៃទី១៥តទៅ អាជ្ញាធរ និងសមត្ថកិច្ចក្រុងនឹងចាត់វិធានការណ៍ម៉ឺងម៉ាត់ជាក់ជាមិនខាន៕
ព័ត៌មានជាតិ
មតិយោបល់