កំពង់ឆ្នាំង៖ ទីតាំងចាក់សំរាមចោលមួយកន្លែង បានរងការរិះគន់ពីប្រជាពលរដ្ឋ និងអាជ្ញាធរមូលដ្ឋាន នៅពេលគេអោយឈប់ចាក់សំរាមនៅទីនោះហើយ អ្នកម៉ៅការដឹកសំរាមនៅក្នុងក្រុងកំពង់ឆ្នាំងនៅតែបន្តដឹកសំរាម លួចយកទៅចាក់ចោលនៅទីនោះយ៉ាងអនាធិប្ប តេយ្យ។ទីតាំងចាក់សំរាមនោះស្ថិតនៅចំណុចជើងភ្នំតូច ស្ថិតក្នុងភូមិគល់គុប ឃុំស្រែថ្មី ស្រុករលាប្អៀរ ខេត្តកំពង់ឆ្នាំង។
លោកអភិបាលស្រុករលាប្អៀរបានអោយអ្នកយកព័ត៌មានយើងដឹងថា៖នៅក្នុងឆ្នាំ២០១៤ ទីតាំងចាក់សំរាមខាងលើ ត្រូវបានអាជ្ញាធរខេត្តអនុញាតិអោយអ្នកម៉ៅការដឹកសំរាម ជីករណ្តៅសំរាប់ដឹកសំរាមពីក្រុងកំពង់ឆ្នាំងទៅចាក់ចោលនៅទីនោះ។តាមការពិនិត្យជាក់ ស្តែងអន្លុងដែលគេជីកសំរាប់ចាក់សំរាមនោះមិនធំឡើយ គឺគេដឹកសំរាមចាក់បានប្រមាណ៦ខែ ក៍ពេញហូរហៀរអស់ទៅហើយ។ក្រោយមកគេក៍បានចាក់សំរាមពាសវាលពាសកាលនៅក្នុងតំបន់នោះ ធ្វើអោយមានការប៉ះពាល់យ៉ាងខ្លាំងដល់បរិស្ថាន និងសុមាលភាពរបស់ប្រជាពលរដ្ឋ។បន្ទាប់មកអាជ្ញាធរខេត្ត ក៍បានហាមឃាត់មិនអោយចាក់សំរាមនៅទីនោះទៀត លុះត្រាអ្នកម៉ៅការដឹកសំរាមនោះបានជីករណ្តៅអោយបានត្រឹមត្រូវសិន។
លោក នូ ឃៀន មេឃុំស្រែថ្មី បាននិយាយអោយដឹងនៅព្រឹកថ្ងៃទី១០ ខែធ្នូ ឆ្នាំ២០១៤នេះថា៖ការចាក់សំរាមយ៉ាងអនាធិប្បតេយ្យខាងលើនេះ បានបង្កអោយមានក្លិនស្អុយអសោច និងមានសត្វរុយជាច្រើនដូចឃ្មុំនៅតំបន់នោះ។មិនតែប៉ុណ្ណោះ ក្រោយពីមានការ ហាមឃាត់របស់អាជ្ញាធរ អ្នកម៉ៅការដឹកសំរាមក៍នៅបានលួចចាក់សំរាមតាមចិញ្ចើមផ្លូវ លំម្តុំអាស្រមយាយម៉ៅម្តងម្កាលទៀត ដែលធ្វើអោយប្រជាពលរដ្ឋរិះគន់យ៉ាងខ្លាំង។
ដោយឡែកប្រជាពលរដ្ឋនៅក្នុងក្រុងកំពង់ឆ្នាំងវិញ ក៍បានធ្វើការរិះគន់ផងដែរថា៖អ្នកម៉ៅការដឹកសំរាមនៅក្នុងក្រុងកំពង់ឆ្នាំង មិនបានបំពេញតួនាទីរបស់ខ្លួនអោយបានត្រឹម ត្រូវឡើយ មានពេលខ្លះ២ទៅ៣ថ្ងៃទើបមកដឹកយកសំរាមម្តងនៅតាមមុខផ្ទះប្រជាពលរដ្ឋ ហើយការដឹកជញ្ជូនទៀតសោតពេលខ្លះអ្នកបើកបររថយន្តដឹកសំរាមនោះបានធ្វើអោយសំរាមជ្រុះរប៉ាត់រប៉ាយលើផ្លូវកៅស៊ូក្នុងទីក្រុង ព្រោះតែគេដឹកសំរាមសំពីងសំពោងច្រើនពេក គ្មានអ្វីគ្របពីលើ។
ករណីខាងលើនេះប្រជាពលរដ្ឋសំណូមពរដល់អ្នកម៉ៅការដឹកសំរាម និងអ្នកគ្រប់ គ្រងកិច្ចការខាងលើនេះរួមនឹងសមត្ថកិច្ចនគរបាលក្រុងកំពង់ឆ្នាំង មេត្តាជួយណែនាំ អប់រំ ឬផាកពិន័យដល់អ្នកម៉ៅការសំរាម និងអ្នកបើកបររថយន្តដឹកសំរាមអោយបានម៉ឺងម៉ាត់ ដើម្បីចូលរួមថែររក្សាអនាម័យ និងបរិស្ថាននៅក្នុងក្រុង និងទីតាំងចាក់សំរាមអោយបានល្អ៕
ព័ត៌មានជាតិ
មតិយោបល់