ស្ពានអ្នកលឿង ដែលនឹងតភ្ជាប់ខេត្តកណ្ដាល និងខេត្តព្រៃវែងត្រូវបានតភ្ជាប់គ្នាហើយកាលពីថ្ងៃច័ន្ទកន្លងទៅនេះ ហើយនឹងត្រូវបើកឲ្យធ្វើដំណើរមុនចូលឆ្នាំខ្មែរ ក្នុងខែមេសា។ នេះបើយោងតាមមន្ត្រីជាន់ខ្ពស់របស់ខេត្តកណ្ដាលបានប្រាប់ឲ្យដឹង។
លោក ផៃ ប៊ុនឈឿន អភិបាលខេត្តកណ្ដាលបានឲ្យដឹងថា ការសាងសង់ស្ពានអ្នកលឿងនឹងបញ្ចប់នៅខែក្រោយ ដោយបច្ចុប្បន្ន ស្ពាននេះត្រូវបានសាងសង់រួចរាល់៩៥ភាគរយហើយ។ លោកបានមានប្រសាសន៍បន្ថែមថា “ស្ពាននេះនឹងត្រូវសាងសង់រួចរាល់នៅពាក់កណ្ដាលខែមករា ឆ្នាំ២០១៥ ហើយសម្ដេចនាយករដ្ឋមន្ត្រី [ហ៊ុន សែន] នឹងទៅសម្ពោធមុនចូលឆ្នាំខ្មែរ”។
លោក ផៃ ប៊ុនឈឿន បានលើកឡើងទៀតថា “នៅពេលស្ពាននេះត្រូវបានបើកឲ្យដំណើរការ សាឡាងអ្នកលឿងនឹងនៅតែបន្តប្រតិបត្តិការ ប៉ុន្តែប្រហែលជាត្រូវយកទៅកន្លែងផ្សេងដែលអាចមានប្រយោជន៍ជាងនេះ”។
គួរបញ្ជាក់ផងដែរថា ស្ពានអ្នកលឿងកំពុងត្រូវបានសាងសង់ក្រោមជំនួយទឹកប្រាក់ប្រមាណ១១៨លានដុល្លារ ពីរដ្ឋាភិបាលជប៉ុន ដែលក៏ផ្ដល់មូលនិធិសម្រាប់ការជួសជុលផ្លូវជាតិលេខ១ឡើងវិញផងដែរនោះ៕
មតិយោបល់