ជនសង្ស័យម្នាក់ត្រូវបានកម្លាំង អ ហ ក្រុងប៉ោយប៉ែត ធ្វើការឃាត់ខ្លួនក្រោយពីមានជនរងគ្រោះ ម្នាក់បានប្តឹងមកថា ជននេះបានយកប្លង់ដីក្លែងក្លាយមកបញ្ចាំយកប្រាក់១លានបាត រួចនាំគ្នារត់គេចខ្លួន ទាំង២នាក់ប្តីប្រពន្ធ ដល់ថ្ងៃកំណត់ត្រូវបង់ប្រាក់ម្ចាស់លុយទៅរកនៅផ្ទះក៏មិនឃើញជាច្រើនលើក និង បាត់មុខជាច្រើនខែទើប ជនរងគ្រោះសម្រេចដាក់ពាក្យប្តឹងឲ្យសមត្ថកិច្ចចាប់ខ្លួនតែម្តងទៅ។
ជនសង្ស័យដែលសមត្ថកិច្ចចាប់ខ្លួនមានឈ្មោះ សាមាន ធួក ភេទប្រុស អាយុ៣៣ឆ្នាំ ភេទប្រុស មានស្រុកកំណើតនៅភូមិដុង ឃុំព្រា ស្រុកកញ្ច្រៀច ខេត្តព្រៃវែង សព្វថ្ងៃរស់នៅភូមិបាលិលេយ្យ សង្កាត់/ក្រុងប៉ោយប៉ែត ខេត្តបន្ទាយមានជ័យ មានមុខរបរមិនពិតប្រាកដ។រីឯជនរងគ្រោះមានឈ្មោះ រស់ ស្រ៊ាង ភេទស្រី អាយុ៤០ឆ្នាំ រស់នៅភូមិក្បាលកោះ សង្កាត់ប៉ោយប៉ែត ជាម្ចាស់ហាងប្តូរប្រាក់ដ៏ធំ នៅជាយដែន យីហោសុធារ៉ា ហើយស្ត្រីរងគ្រោះក៏ត្រូវជាប្រពន្ធរបស់លោក សូរ ចាន់ណារី មេបញ្ជាការ វរះនគរបាលការពារព្រំដែនគោកលេខ៩១១ផង។
យោងតាមពាក្យបណ្តឹងស្រីរងគ្រោះឈ្មោះ រស់ ស្រ៊ាង បានអះអាងថា នៅថ្ងៃទី៥ ខែវិច្ឆិកា ឆ្នាំ២០១៤ កន្លងទៅឈ្មោះ សាមាន ធួក និងប្រពន្ធឈ្មោះ អ៊ីង ស្រស់ បានយកប្លង់ដីមួយច្បាប់មកដាក់ បញ្ចាំដើម្បីខ្ចីប្រាក់របស់ខ្លួនយកទៅរកស៊ីចំនួន១លានបាត ដោយសារតែធ្លាប់ស្គាល់និងជឿទុក្ខចិត្ត ក៏បានឲ្យខ្ចីនិងវេបញ្ជូលទៅក្នុងកុងធានាគារលេខ៥០៤២០៧៧៨៤៦របស់អ្នកទាំង២ខាងលើ ដោយ មិនបានពិនិត្យប្លង់ដីនោះឡើយ។ស្ត្រីរងគ្រោះបន្តថា ក្រោយមកដល់ថ្ងៃកំណត់ទារប្រាក់ទៅរក អ្នកទាំង ២នាក់ប្តីប្រពន្ធមិនឃើញឡើយ ដោយដឹងថាគេបោកប្រាស់ទើបគាត់សម្រេចដាក់ពាក្យប្តឹងឲ្យ សមត្ថកិច្ចជួយអន្តរាគមន៍។
ពាក់ពន្ធ័ករណីនេះលោកឧត្តមសេនីយ៍ត្រី ឱ បូរិន មេបញ្ជាការ អ ហ ខេត្តបន្ទាយមានជ័យ បានឲ្យដឹងថា ក្រោយបើកការស្រាវជ្រាវនៅថ្ងៃទី២៥ ខែមករា ឆ្នាំ២០១៥នេះ ឈ្មោះ សាមាន ធួក នេះ បានបង្ហាញខ្លួននៅក្នុងផ្ទះសំណាក់មួយនៅជាយដែនប៉ោយប៉ែត ទើបលោកបញ្ជាឲ្យកម្លាំង អ ហ ក្រុង ប៉ោយប៉ែត ឃាត់ខ្លួនយកមកសួរនាំ ទើបដឹងថា ប្លង់ដីដែលដាក់បញ្ចាំនោះជាប្លង់ដីក្លែងក្លាយ ហើយពួក គេបានរត់គេចខ្លួនតាំងពីក្រោយទទួលបានប្រាក់ពីជនរងគ្រោះមកម្លេះ។បច្ចុប្បន្នសមត្ថកិច្ចកំពុងកសាង សំណុំរឿងបញ្ជូនទៅតុលាការចាត់ការតាមច្បាប់។ ប្រភពច្បាស់ការមួយបានទម្លាយឲ្យដឹងថា ជនសង្ស័យឈ្មោះ សាមាន ធួក នេះគឺជាមេខ្យល់នាំ មនុស្សឆ្លងដែនខុសច្បាប់ដ៏ធំនៅក្រុងប៉ោយប៉ែត តែមិនដែលធ្លាប់ត្រួវបានសមត្ថកិច្ចចាប់ឬបង្ក្រាបម្តង ណាឡើយ ដែលបញ្ហាគេមិនដឹងថាមេខ្យល់ម្នាក់នេះមានវេទមន្តអីសណ្តំសមត្ថកិច្ចឡើយ។ ប្រភព ដដែលបានបញ្ជាក់ថា ជននេះតែងតែដើរប្រមូល លួងលោមពលរដ្ឋនៅតាមបណ្តាខេត្តផ្សេង រួចដឹកមក ប៉ោយប៉ែត រួចមានកូនដៃ(បក្ខពួក)ចាំដឹកជញ្ជូនចែកចាយបន្តទៅព្រំដែនដូចជាច្រកបឹងត្រកួន ច្រកម៉ាឡៃ និងច្រកសិលាខ្មែរ នៅឃុំអូរបីជាន់ ដើម្បីនាំឆ្លងដែនទៅប្រទេសថៃ ដោយខុសច្បាប់៕
មតិយោបល់