ភ្នំពេញ៖ រដ្ឋមន្ត្រីក្រសួងពាណិជ្ជកម្ម លោក ស៊ុន ចាន់ថុល បានមានប្រសាសន៍ថា វិស័យឯកជនត្រូវចូលរួមជាមួយរាជរដ្ឋាភិបាល ដើម្បីប្រឆាំងអំពើពុករលួយ ហើយវិស័យឯកជនទាំងអស់ត្រូវតែនាំគ្នាចុះហត្ថលេខាលើអនុស្សរណៈនៃការយោគយល់ (MOU) ជាមួយអង្គភាពប្រឆាំងអំពើពុករលួយ (ACU) ដើម្បីលុបបំបាត់អំពើពុករលួយ និងធ្វើជាក្បាលរថភ្លើងអូស ទាញសេដ្ឋកិច្ចជាតិទៅមុខ។
ថ្លែងនៅក្នុងសន្និសីទថ្នាក់ជាតិស្តីពី “យន្តការដើម្បីការអភិវឌ្ឍវិស័យឯកជន សហថាមពលកំណើននិងសហគមន៍សេដ្ឋកិច្ចអាស៊ាន” កាលពីព្រឹកថ្ងៃទី០៣ ខែមីនាឆ្នាំ២០១៥នៅសណ្ឋាគារកាំបូឌីយ៉ាណា លោក ស៊ុន ចាន់ថុល បានគូសបញ្ជាក់ថា រាជរដ្ឋាភិបាលចាត់ទុកវិស័យឯកជនជាក្បាលរថភ្លើង ប្រសិនបើក្បាលរថភ្លើងនេះពុករលួយ តើអាចអូសទាញសេដ្ឋកិច្ចខ្មែរទៅមុខយ៉ាងដូចម្តេច? ដូច្នេះត្រូវជួសជុលក្បាលរថភ្លើងឱ្យបានល្អ ដើម្បីអូសទាញសេដ្ឋកិច្ចខ្មែរទៅមុខ៕
មតិយោបល់