កូឡាឡាំពួ៖ ក្រុមហ៊ុនអាកាសចរណ៍ AirAsia គ្រោងនឹងបោះផ្សាយលក់មូលបត្រជាសាធារណៈលើកដំបូង (IPO) សម្រាប់ក្រុមហ៊ុនអាជីវកម្មរបស់ខ្លួននៅប្រទេសឥណ្ឌូនេស៊ីនៅដើមឆ្នាំក្រោយ ខណៈតម្រូវការធ្វើដំណើរកើនឡើង។ នេះបើយោងតាមការចុះផ្សាយរបស់ Bloomberg ចេញផ្សាយកាលពីថ្ងៃចន្ទម្សិលមិញ។
នាយកប្រតិបត្តិក្រុមហ៊ុន AirAsia លោក Tony Fernandes បានឲ្យដឹងថា ក្រុមហ៊ុនអាកាសចរណ៍មួយនេះនឹងចាត់តាំងមន្ត្រីធនាគារមួយចំនួនឲ្យរៀបចំការបោះផ្សាយ IPO ក្នុងពេលឆាប់ៗនេះ ហើយនឹងប្រកាសពីការបោះផ្សាយលក់មូលបត្រនេះនៅក្នុងរយៈពេលប៉ុន្មានខែខាងមុខ។
យោងតាមសមាគមដឹកជញ្ជូនផ្លូវអាកាសអន្តរជាតិ ក្រុមហ៊ុនអាកាសចរណ៍នេះសង្ឃឹមថានឹងទាញយកផលប្រយោជន៍ពីកំណើនយ៉ាងឆាប់រហ័សនៅក្នុងតំបន់អាស៊ីប៉ាស៊ីហ្វិក ដែលចំនួនអ្នកធ្វើដំណើរអាចនឹងកើនឡើងជិត៥ភាគរយក្នុងមួយឆ្នាំក្នុងពេលពីរទសវត្សរ៍ខាងមុខ។
គួរបញ្ជាក់ផងដែរថា AirAsia ជាក្រុមហ៊ុនអាកាសចរណ៍ផ្តល់សេវាហោះហើរក្នុងតម្លៃទាបធំជាងគេទីពីរនៅអាស៊ីគិតតាមតម្លៃទីផ្សារ៕
ព័ត៌មានជាតិ
មតិយោបល់